امیرالمومنین حضرت خلیفۃالمسیح الخامس ایدہ اللہ تعالیٰ بنصرہ العزیز کا دورۂ جرمنی ستمبر 2018ء

2 نومبر 2018ء

0 پڑھنے کے لئے 44 منٹ

(عبد الماجد طاہر۔ ایڈیشنل وکیل التبشیر)

…’’اس وقت احمدیہ مسلم جماعت جو دنیا میں ہرجگہ ہے وہ خلافت کے سایہ تلے ایک ہی آواز پر اُٹھنے بیٹھنے والی ہے اور ایک ہی طرح کی سوچ رکھنے والی ہے اور ایک ہی تعلیم پر عمل کرنے والی ہے جبکہ دوسرے مسلمانوں کے پاس ایسا کوئی لیڈر نہیں ہے۔ ‘‘ … حضور سے ملاقات کر نے کی سعادت نصیب ہوئی اور جو نور آپ کے چہرہ سے جھلک رہا تھا وہی نور ہے جس کی وجہ سے جماعت کا ہر فرد ایک لڑی میں پرویا ہوا ہے۔ …حضور کی تقاریر نے میرے دل پر بہت گہرا اثر کیا۔ میں تقریر کے دوران روتی رہی اور مجھے ایسا لگتا تھا کہ اب میری نئی زندگی شروع ہو رہی ہے۔ میں کوشش کروں گی کہ باقی زندگی آپ کے ارشادات کی روشنی میں گزاروں۔ …میں امام جماعت کو قریب سے دیکھ رہا تھا کہ آپکی شخصیت میں کس قدر قوتِ جاذبہ ہے اور آپکے چہرہ پر کس قدر سکون ہے میں بلا مبالغہ کہتا ہوں کہ آپ کی ذات مجسم امن و سلامتی ہے۔ …جو باتیں جماعت کے خلاف سنی تھیں، جلسہ کا ماحول دیکھ کر اب میرا دل ہر لحاظ سے صاف ہو گیا ہے۔ سب طرف بھلائی اور قرآن و حدیث کی تعلیم تھی۔ آپ کے ماٹو ’محبت سب کے لئے اور نفرت کسی سے نہیں‘ نے مجھے بہت متاثر کیا۔ ہر طرف سکون ہی سکون تھا۔ خاص طور پر حضور کے آنے پر بہت سکون ملتا تھا۔ جلسہ کے دوران ہی میں نے فیصلہ کیا کہ اب میں بھی احمدیت میں داخل ہوتا ہوں۔ …حضورانور کے چہرہ میں ایک نور ہے جو کہ ہم نے مشاہدہ کیا ،کاش ہمارے ملک کے لوگ بھی اس نور کو مشاہدہ کریں ۔ …جلسہ کے دوران میں نے محسوس کیا ہے کہ خدا موجود ہے اور اس کی برکتیں یہاں امن اور سلامتی اور اطمینان قلب کی شکل میں نازل ہو رہی ہیں۔ …جماعت احمدیہ ہی ہے جو صحیح اسلامی تعلیمات پر عمل پیرا ہے۔ میں نے یہاں اسلام کا ایک پاک چہرہ دیکھا ہے۔ …میں نے زندگی میں اس سے قبل اتنے اچھے لوگ نہیں دیکھے جو اس پیمانے پر مثبت خیالات اور مثبت سوچ کو پھیلا رہے ہوں۔

جلسہ سالانہ جرمنی پر مختلف ممالک سے تشریف لانے والو وفود کی حضورِ انورسے ملاقات، مختلف سوالات اور ان کی بصیرت افروز جوابات نیز احمدی و غیر احمدی مہمانوں کی تأثرات کا تذکرہ

… … … … … … … …

10؍ ستمبر 2018ء بروز سوموار

(حصہ دوم )

… … … … … … … …

Kosovo سے آنے والےوفد کی ملاقات

بعد ازاں پروگرام کے مطابق ملک کوسووو (Kosovo) سے آنے والے وفد نے حضور انور ایدہ اللہ تعالیٰ بنصرہ العزیز کے ساتھ شرف ملاقات پایا۔

کوسووو سے 42؍ افراد پر مشتمل وفد جلسہ سالانہ جرمنی میں شامل ہوا۔

• وفد کے ممبران نے حضور انور کی خدمت میں عرض کیا کہ ہمیں جلسہ بہت اچھا لگا۔ ہم جلسہ کے سارے انتظامات سے بڑے متاثر ہوۓ ہیں اور ہماری مہمان نوازی بہت اچھی کی گئی۔

ایک دوست نے عرض کیا کہ آپ نے ہمیں جلسہ پر آنے کی دعوت دی۔ اس پرمیں آپ کا شکریہ ادا کرتا ہوں۔ مجھے امید نہیں تھی اور میں نے سوچا بھی نہیں تھا کہ اتنا زبردست اور اچھا انتظام ہوگا۔

• ایک خاتون کہنے لگیں کہ میں پہلی دفعہ آئی ہوں۔ ہمارابہت اچھا خیال رکھا گیا۔ سب انتظام ٹھیک تھا۔ بہت اچھا تھا۔

• ایک دوست نے عرض کیا کہ وہ تکلیف کی وجہ سے چل نہیں سکتے تھے۔ جب انہوں نے حضور انور کی خدمت میں دعا کا خط لکھا تو اس کے بعد اللہ نے بہت فضل فرمایا اور انہوں نے چلنا شروع کر دیا اور ان کی طبیعت بہتر ہو گئی اور اب وہ جلسہ پر آۓ ہیں۔اس پر حضور انور نے مبلغ سلسلہ کو ہدایت فرمائی کہ ان کے حالات لکھ کر بھجوائیں تو انکو ہومیو پیتھی دوائی دوں گا۔

٭ ایک دوست نے عرض کیاکہ میں نے اس جلسہ کے موقع پر بیعت کی توفیق حاصل کی ہے۔ میری فیملی کے بعض مسائل ہیں۔ میرے دو کزن کوسوو کی دو بڑی مسجدوں کے ملّاں ہیں اور ان کی طرف سے شدید مخالفت کا سامنا ہے۔ اگر حضورانور مجھے کوئی گُر بتاسکیں کہ جس سے مجھے فائدہ ہو اور میں انہیں سمجھاسکوں ۔

اس پر حضورانور ایدہ اللہ تعالیٰ بنصرہ العزیز نے فرمایا: اس میں تو یہی ہے کہ ان کے لئے دعاکریں اور ان کے ساتھ پیارکا سلوک رکھیں۔ ان کے ساتھ اسلامی تعلیمات کے مطابق سلوک کریں۔اگر وہ سختی کرتے ہیں تو آپ اُن کا پیارسے جواب دیں۔ اس کے علاوہ تو اور کوئی گُر نہیں ہے۔ اگر کوئی گُر ہوتاتو ہم اسے پاکستان میں استعمال کرلیتے۔ دوسرایہ کہ کل میں نے بعض واقعات سنائے اور پہلے بھی کئی دفعہ سُنا چکاہوں کہ احمدیت قبول کرنے کے بعد مخالفتوںکاسامناکرناپڑتاہے۔یہ تواللہ تعالیٰ نے فرما دیا ہے کہ یہ دیکھنے کے لئے کہ تم ایمان میں کتنے مضبوط ہوتمہیں آزمایاجاتاہے۔یہ توقرآن شریف میں اللہ تعالیٰ نے لکھ دیاہے کہ آزمائے بغیر تمہارے ایمان کی مضبوطی کا پتہ نہیں لگ سکتا۔اس لئے پریشان ہونے کی ضرورت نہیں۔ اللہ تعالیٰ سے دعاکرتے رہیں، ان کے ساتھ نیک سلوک کرتے رہیں تو ایک وقت آئے گاکہ اچھے حالات ہوجائیں گے ۔میں نے کل ایک واقعہ سنایاتھاکہ ایک شخص کی بیوی پانچ سال تک اُس کی مخالفت کرتی رہی وہ پانچ سال تک اپنی بیوی کے لئے دعاکرتارہا تو پانچ سال بعد اس کی دعاقبول ہوئی۔ آنحضرت ﷺ کے زمانہ میں سالوں پرسی کیوشن (persecution) ہوتی رہی اور لوگ تنگ کرتے رہے۔ آنحضرت ﷺ کی دعاؤں کے باوجود بعض لوگوں کی اصلاح نہیں ہوسکی۔ لیکن جن کی اصلاح ہونی تھی ان پر دعاؤں کا فوری اثر بھی ہوتارہا، جن کی اصلاح اللہ تعالیٰ کرنا چاہتا تھا، ان کے حق میں آنحضرت ﷺ کی دعائیں فوراً قبول بھی ہوگئیں اوران کی اصلاح بھی ہوگئی۔ پس آپ دعا کرتے رہیں، ان کے ساتھ نیک سلوک کرتے رہیں اور باقی اللہ تعالیٰ پر چھوڑ دیں۔

ممبرانِ وفد کے تأثرات

٭ کوسوو کے وفد میں ایک ریاضی کے پروفیسر Aziz Neziri صاحب بھی شامل تھے، جو اسی سال بیعت کرکے احمدیت میں شامل ہوئے ہیں۔ انہوں نے اپنے تاثرات کا اظہار کرتے ہوئے کہا: جلسہ سالانہ بہت اچھا تھا، انتظامات بھی قابل تعریف تھےنیز ہمارا بہت اچھا خیال رکھا گیا۔

٭ کوسوو وسے ایک وکیل Ardian Zeiqiraj صاحب اپنے تأثرات بیان کرتے ہوئے کہتے ہیں:

اس جلسہ کے نظام کو دیکھ کر ایسا لگتا ہے کہ ہر کوئی خلافت کی اطاعت میں سرگرداں اپنا کام کر رہا ہے۔ یہ تمام اطاعت اس وجود کی محبت تھی جو خلیفہ وقت کی شکل میںجماعت احمدیہ کو نصیب ہے۔ حضور سے ملاقات کر نے کی سعادت نصیب ہوئی اور جو نور آپ کے چہرہ سے جھلک رہا تھا وہی نور ہے جس کی وجہ سے جماعت کا ہر فرد ایک لڑی میں پرویا ہوا ہے۔ کوسووو میں بھی اس طرح کے اجتماع وغیرہ ہوتے ہیں لیکن اس جلسہ میں شامل ہوکر ایک الگ ہی کیفیت انسان پر تاری ہوتی ہے کہ ہر رنگ و نسل کے لوگ اس جلسہ میں شامل ہیں اور ہر ایک کی ضرورت کے مطابق ان کا خیال رکھا جا رہا ہے۔

٭ کوسووو کے وفد میں شامل ایک بینک کے چیف Mustafa Valdon صاحب پانچ سال بعد جلسہ میں شامل ہوئے۔ یہ اپنے تاثرات کا اظہار کرتے ہوئے کہتے ہیں:

ہر قوم کے لوگ اس جلسہ میں شامل ہیں۔ جلسہ کی جگہ اب چھوٹی ہو گئی ہے اور یہ خوشی کی بات ہے کہ جماعت جرمنی نے اتنی جلدی ترقی کر لی ہے۔ خاکسار 5 سال بعد شامل ہوا ہے اس لئے تقریب بیعت میں جو روحانی ماحول تھا خاکسار کو اس کی ضرورت تھی تاکہ روحانیت میں اضافہ کر سکوں۔

٭ کوسووو کے Besmir Yvejsiaصاحب جو کہ اسلامی سائنس کے ماہر ہیں، اپنے تاثرات کا اظہار کرتے ہوئے کہتے ہیں:

تقاریرکے موضوعات عین وقت کی ضرورت کے مطابق تھے اور تمام سوالات کے جوابات ان میں موجود تھے۔ تقاریر بہت عمدہ طور پر کی گئیں اور ہماری زبان میں ان تقاریر کے تراجم کا معیار بہت اعلیٰ تھا۔ حضور انور سے مل کر بہت اچھا لگا۔ حضور انور کی باتیں اورا قوال آپ کے مبارک وجود کی عکاسی کرتے ہیں۔ آج کے دور میں ایسے وجود ملنا ناممکن ہیں جن کے قول و فعل میں تضاد نہ ہو۔

٭ کوسووو کے وفد میں ایک فزکس کے پروفیسر Arber Zeiqiraj صاحب بھی شامل تھے۔ یہ اپنے تاثرات کا اظہار کرتے ہوئے کہتے ہیں:

اتنے لوگوں کا ایک جگہ جمع ہونا اور ان کی ضروریات کا پوراکیا جانا ناممکن سا لگتا تھا۔ جلسہ میں شامل ہو کرتمام انتظامات کو بغور دیکھا کہ کس طرح ہر چیز ایک نظام کے ساتھ چل رہی ہے اور ضروریات کا خیال رکھا جارہا ہے۔ ہر ایک کام کے لئے ایک خادم مقرر تھا ۔ لنگر میں جانے کا اتفاق ہوا، وہاں ایک شخص سے ملاقات ہوئی اور معلوم ہوا کہ وہ پچھلے 22سال سے پیاز چھیلنے کا کام کررہا ہے۔ اور پچھلے 22 سال سے اس کے پاس ایک ہی چھری ہے جس سے وہ پیازوں کو کاٹتا ہے۔ اس شخص نے کہا کہ میں اس چھری کو اس لئے استعمال کرتا ہوں کیونکہ حضرت خلیفۃ المسیح الرابع رحمہ اللہ نے ایک مرتبہ اسے پکڑا تھا۔

٭ ایک اور دوست Arber Zeiqiraj صاحب کہتے ہیں کہ جلسہ کا مکمل انتظام صرف اور صرف خلافت کی محبت ہی کی وجہ سے ہے کہ ہر چیز میں ایک یکجہتی نظر آتی ہے۔

Kosovo کے وفد کی حضور انور ایدہ للہ تعالیٰ بنصرہ العزیز سے یہ ملاقات بارہ بجکر 35منٹ تک جاری رہی۔ آخر پر ممبران نے تصاویر بنوانے کی سعادت پائی۔

ماریشس کے وفد کی ملاقات

بعد ازاں جماعت احمدیہ ماریشس کے وفد نے حضور انور ایدہ اللہ تعالیٰ بنصرہ العزیز سے ملاقات کی سعادت پائی۔ ماریشس سے امسال 30؍ افراد پر مشتمل وفد آیا تھا۔

• حضور کے استفسار پر وفد کے ممبران نے بتایا کہ جلسہ سالانہ کے انتظامات بڑے منظّم طریق پر تھے اور ہم سب نے جلسہ سے بھر پور استفادہ کیا۔

رہائش کے حوالہ سے ممبران نے بتایا کہ ہماری رہائش جلسہ گاہ میں ہی تھی۔ اس وجہ سے ہم نے پانچوں نمازیں حضور انور کی اقتداء میں ادا کیں اور روحانی طور پر بہت فائدہ حاصل کیا ہے۔

• ایک نوجوان نے عرض کیا کہ میں یہاں کوبلنز یونیورسٹی(Koblenz University) جرمنی میں تعلیم حاصل کر رہا ہوں۔ سول انجینئرنگ کر رہا ہوں۔ اس پر حضور انور نے فرمایا۔ خدا تعالیٰ فضل فرمائے۔

• ماریشس کے وفد کی حضور انور ایدہ اللہ تعالیٰ بنصرہ العزیز سے یہ ملاقات بارہ بجکر 35 منٹ تک جاری رہی۔

آخر پر تمام ممبران نے باری باری فیملی وائز اپنے پیارے آقا کے ساتھ تصاویر بنوانے کی سعادت پائی۔

نائیجر، بورکینا فاسو اورگنی کوناکری کے وفود کی ملاقات

اس کے بعد پروگرام کے مطابق نائیجر (Niger)، بورکینا فاسو (Burkina Faso)اور گنی کوناکری (Guinea Conakry)سے آنے والے وفود نے حضور ایدہ اللہ تعالیٰ بنصرہ العزیز سے ملاقات کی سعادت پائی۔ یہ ملاقات داعی الی اللہ روم میں ہوئی۔

نائیجر سے دَس افراد اور بورکینا فاسو سے آٹھ افراد پر مشتمل وفد جبکہ گنی کوناکری سے تین افراد پر مشتمل وفد اس جلسہ میں شامل ہوا۔

• نائیجر سےآنے والے ایک احمدی امام IDI KAMAYE صاحب نے عرض کیا کہ جلسہ سالانہ کے تمام انتظامات بہت اچھے تھے۔ کسی جگہ کوئی کمی نظر نہیں آئی۔ یہ میرا پہلا جلسہ سالانہ ہے اور میں نے اپنی زندگی میں پہلی دفعہ حضور کو اپنے سامنے اتنے قریب سے دیکھا ہے۔ یہاں کی انتظامیہ نے ہمارا بہت خیال رکھا ہے۔

• ایک لوکل مشنری LAWALI CHAIBOU OUMAR صاحب نے عرض کیا کہ جلسہ سالانہ بہت اچھا گزرا۔ ہمارے لئے دعا کریں کہ ملک نائیجر میں بھی اللہ تعالیٰ ہمیں کامیابیاں عطا کرے۔ بہت سے مخالف امام ایسے ہیں جو مستقل ہماری مخالفت کرتے ہیں اور ہمیں تنگ کرتے ہیں۔

اس پر حضور انور نے فرمایا کہ جو مخالف امام ہیں وہ تو مخالفت کریں گے۔ پاکستان میں جتنا مولوی تنگ کرتے ہیں اتنا تنگ تو نہیں کرتے۔ وہاں حکومت ان مولویوں کے ساتھ ملی ہوئی ہے۔ افریقہ کے اماموں میں شرافت ہے ان کو سمجھاؤ تو سمجھ جاتے ہیں۔ ان کے لئے دعا کرتے رہیں اور حکمت کے ساتھ ان کو تبلیغ کرتے رہیں۔

• ایک مقامی معلّم نے عرض کیا کہ ملک کے معاشی حالات کافی خراب ہیں اس پر حضور انور نے فرمایا کہ کوئی قوم اپنے آپ کو بہتر کرنے کا ارادہ کرے تو تب قومیں بہتر ہوتی ہیں اور ان کے حالات تبدیل ہوتے ہیں۔ جماعت احمدیہ اس کے لئے بھی کوشاں ہے۔

• نائیجر سے آنے والے صدر مجلس انصار اللہ LOUE DEYDOU صاحب نے عرض کیا کہ میں اصل میں آئیوری کوسٹ سے ہوں اور گزشتہ دس 10 سال سے نائیجر میں مقیم ہوں۔ قبل ازیں بورکینا فاسو اور نائیجیریا میں بھی حضور انور سے ملاقات کی سعادت حاصل کر چکا ہوں۔ جلسہ جرمنی کے تمام انتظامات بہت اچھے تھے۔ ایک لیڈر ایک کمیونٹی کا نظارہ ہم نے یہاں دیکھا ہے۔ موصوف نے عرض کیا کہ نائیجر میں97 فیصد مسلمان ہیں اور عرب ممالک نے یہاں بہت INVESTکیا ہوا ہے۔ ہمارے ملک میں احمدیت نے بھی سچائی دکھائی ہے۔ نائیجر جماعت کے لئے دعا کی درخواست ہے۔ اس پر حضور انور نے فرمایا: اللہ تعالیٰ فضل فرمائے۔

• حضور انور نے نائیجر سے آنے والے مبلغ سلسلہ کو ہدایت فرمائی کہ کوشش کر کے اپنی تمام جماعتوں میں MTA لگائیں۔ اس پر مبلغ نے عرض کیا کہ مرکز سے آرکیٹکٹ اینڈ انجینئرز ایسو سی ایشن سولر سسٹم اور MTA لگانے کی کوشش کر رہے ہیں۔

• ملک گنی کوناکری (GUINEA CONAKRY)سے آنے والے مہمان ڈاکٹر محمد AWADA صاحب نے عرض کیا کہ وہ گنی کوناکری کے ایک بڑے ہسپتال کے نیشنل ڈائریکٹر ہیں اور اصل میں لبنان سے ہیں۔ لیکن ایک لمبے عرصہ سے گنی کوناکری میں آباد ہیں۔

موصوف نے عرض کیا کہ وہ حضور انور کی سادگی، عاجزی اور لیڈر شپ کی بہت قدر کرتے ہیں۔ اللہ تعالیٰ مجھے بھی عاجز، شاکر اور صابر بندہ بناۓ۔ میں آپ کے لئے، آپ کی فیملی کے لئے اور جماعت کے لئے دعا گو ہوں۔ آپ بہت پیار کرنے والے ہیں۔ یہاں آکر مجھے موقعہ ملا ہے اور مَیں نے ایک نئی دنیا دریافت کی ہے۔ آپ لوگ ہی حقیقی اسلام پر عمل پیرا ہیں۔

• گنی کوناکری سے آنے والے ایک احمدی دوست محمد ALLASSANE AKOB صاحب نے عرض کیا کہ میرا اصل وطن بینن ہے اور میں گزشتہ 30 سال سے گنی کوناکری میں ہوں۔ اور 1987ء سے احمدی ہوں۔ میری فیملی اور بچے سب احمدی ہیں۔ یہ جلسہ دیکھ کر بہت خوشی ہوئی۔ ہر چیز اور انتظام اچھا تھا۔ کہیں بھی کوئی جھگڑا نہیں تھا۔ بڑے منظّم طریق پر ہر کام ہو رہا تھا۔

• ملاقات کا یہ پروگرام ایک بجکر دس 10 منٹ تک جاری رہا۔ آخر پر وفود کے تمام ممبران نے حضور انور کے ساتھ تصویر بنوانے کی سعادت پائی۔

کانگو برازاویل کے وفد کی ملاقات

بعد ازاں حضور انور ایدہ اللہ تعالیٰ بنصرہ العزیز اپنے دفتر تشریف لے آۓ جہاں ملک کانگو برازاویل (CONGO BRAZAVILLE) سے آنے والے وفد نے حضور انور ایدہ اللہ تعالیٰ سے شرف ملاقات حاصل کیا۔ کانگو برازاویل سے تین افراد پر مشتمل وفد اس جلسہ میں شمولیت کے لئے پہنچا تھا جس میں ایک کانگو ٹی وی کے جرنلسٹ DIAKOUNDILA EDECHEVRY صاحب تھے۔

• حضور انور کے استفسار پر جرنلسٹ نے بتایا کہ انہوں نے جلسہ کے پروگراموں کی ویڈیو بنائی ہے اور ایک ڈاکومنٹری تیار کی ہے۔ جمعہ کو شام کی خبروں میں جلسہ جرمنی کے حوالہ سے خبریں نشر ہوئی ہیں اور پھر اتوار کو بھی پروگرام نشر ہوا۔ اس طرح وہ واپس جا کر بھی پروگرام نشر کریں گے۔ جرنلسٹ نے عرض کیا کہ وہاں لوگوں کی طرف سے جماعت کے پروگراموں پر بڑے اچھے تأثرات کا اظہار کیا گیا ہے۔ صرف وہاں کے مولویوں کی طرف سے مخالفت ہے۔

• اس پر حضور انور نے فرمایا کیا مولویوں کی مخالفت کی وجہ سے اپنا چینل بند کردو گے۔ جرنلسٹ نے عرض کیا کہ مَیں گزشتہ دو سال سے جماعت کے پروگرام نشر کر رہا ہوں۔ اس میں حق اور سچائی کے ساتھ ہوں۔ اس پر حضورِانور نے فرمایا ۔ خدا تعالیٰ آپ کو نیکی کی توفیق دے۔

• جرنلسٹ نے عرض کیا کہ یہاں جرمنی جلسہ میں آکر میں نے اپنی آنکھوں سے بہٹ بڑی منظم کمیونیٹی دیکھی ہے۔ مخالف مولوی کہتے تھے کہ یہ تو یہاں کانگو میں ایک چھوٹی سی جماعت ہے۔ باہر کہیں بھی نہیں ہے۔ حضور انور نے فرمایا اب آپ نے اپنی آنکھوں سے دیکھ لیا ہے اب ان مولویوں کو چھوڑ دیں۔ خدا تعالیٰ آپ کو ایمانداری سے کام کی توفیق دیتا رہے اور سچائی پر قائم رکھے۔

• کانگو برازاویل کے وفد کی یہ ملاقات ایک بجکر 45 منٹ تک جاری رہی۔ آخر پر وفد کے ممبران نے باری باری انفرادی طور پر حضور انور کے ساتھ تصاویر بنوائیں۔

• بعد ازاں حضور انور ایدہ اللہ تعالیٰ بنصرہ العزیز کچھ دیر کے لئے اپنی رہائش گاہ پر تشریف لے گئے۔

اعلاناتِ نکاح

دو بجکر پانچ منٹ پر حضور انور ایدہ اللہ تعالیٰ بنصرہ العزیز نے تشریف لاکر نماز ظہر و عصر جمع کر کے پڑھائیں۔ نمازوں کی ادائیگی کے بعد حضور انور ایدہ اللہ تعالیٰ بنصرہ العزیز نے درج ذیل 36 نکاحوں کا اعلان فرمایا:

•٭ عزیزہ طوبیٰ احمد بنت مکرم شمشاد احمد قمر (پرنسپل جامعہ احمدیہ جرمنی) کا نکاح عزیزم نویل احمد شاد (متعلم جامعہ احمدیہ جرمنی) ابن مکرم محمد داؤد شاد صاحب کے ساتھ طے پایا۔

••٭ عزیزہ عائشہ صدیقہ بنت مکرم مبشر احمد صاحب (مربی سلسلہ ربوہ پاکستان) کا نکاح عزیزم مظفر احمد ظفر (مربی سلسلہ ربوہ پاکستان) ابن مکرم منور احمد صاحب کے ساتھ طے پایا۔

٭ عزیزہ شمائلہ صدف بنت مکرم عبدالخالق تبسم صاحب (بدین، سندھ پاکستان) کا نکاح عزیزم حسیب احمد طاہر صاحب( مربی سلسلہ ربوہ) ابن مکرم عبدالعزیز صاحب کے ساتھ طے پایا۔

٭ عزیزہ رُباب ناظم بنت مکرم ناظم علی صاحب (آف گھٹیالیاں، ضلع سیالکوٹ پاکستان)کانکاح عزیزم احتشام فرخ (مربی سلسلہ گرمولہ وِرکاں، گوجرانولہ پاکستان) ابن مکرم طارق جاوید صاحب کے ساتھ طے پایا۔

٭ عزیزہ امتہ النور (واقفہ نو)بنت مکرم عبدالقیوم صاحب (آف ربوہ) کا نکاح عزیزم شجاعت احمد فراز (متعلم جامعہ احمدیہ ربوہ) ابن مکرم مبارک احمد صاحب کے ساتھ طے پایا۔

٭ عزیزہ ماہا سمیع بنت مکرم عبدالسمیع صاحب (آف انٹاریو،کینیڈا)کا نکاح عزیزم انتصاراحمد (متعلم جامعہ احمدیہ جرمنی) ابن مکرم آفاق احمد صاحب کے ساتھ طے پایا۔

٭ عزیزہ فرزانہ اِرم بنت مکرم وسیم احمد صاحب (آف ربوہ ) کا نکاح عزیزم محمد کاشف احمد (متعلم جامعہ احمدیہ ربوہ )ابن مکرم غلام مصطفیٰ صاحب کے ساتھ طے پایا۔

٭ عزیزہ عاصمہ وسیم احمد (واقفہ نو)بنت مکرم وسیم احمد صاحب (آف راٹسے بُرگ، جرمنی )کا نکاح عزیزم راحیل عمر نواز (واقفِ نو )ابن مکرم راشد نواز صاحب (ہمبرگ، جرمنی) کے ساتھ طے پایا۔

٭ عزیزہ مائرہ باجوہ (واقفہ نو)بنت مکرم تنویر احمد باجوہ صاحب (آف راؤن ہائم،جرمنی) کا نکاح عزیزم توصیف احمد (واقفِ نو )ابن مکرم چوہدری اسلام احمد صاحب کے ساتھ طے پایا۔

٭ عزیزہ فریدہ احمد(واقفہ نو)بنت مکرم فہیم رانا صاحب (آف ٹاؤنس شٹائن ، جرمنی) کا نکاح عزیزم توحید احمد (واقفِ نو)ابن مکرم مشتاق احمدصاحب (مائنز، جرمنی کے ساتھ طے پایا۔

٭ عزیزہ نوشین علی(واقفہ نو)بنت مکرم لیاقت علی صاحب (آف برلن، جرمنی) کا نکاح عزیزم مصور احمد فاروقی(واقفِ نو )ابن مکرم مبشراحمدفاروقی صاحب (بادفلبیل، جرمنی) کے ساتھ طے پایا۔

٭ عزیزہ رضوانہ یعقوب (واقفہ نو)بنت مکرم محمد یعقوب صاحب (آف اوفن باخ، جرمنی ) کا نکاح عزیزم سید سرفراز احمد ابن مکرم سید افتخاراحمد گردیزی صاحب (فورس ہائیم ، جرمنی) کے ساتھ طے پایا۔

٭ عزیزہ طوبیٰ احمد(واقفہ نو)بنت مکرم ظہوراحمد صاحب (آف اوفن باخ، جرمنی) کا نکاح عزیزم عاطف بشیر چیمہ ابن مکرم بشیر احمد چیمہ صاحب (آف رونین برگ، جرمنی) کے ساتھ طے پایا۔

٭ عزیزہ طاہرہ احمد بنت مکرم منیر احمد صاحب (آف فرانکفرٹ، جرمنی) کا نکاح عزیزم عامر سعید خان ابن مکرم محفوظ احمد خان صاحب (آف کولون، جرمنی) کے ساتھ طے پایا۔

٭ عزیزہ صباحت ظہیر طاہر(واقفہ نو)بنت مکرم ظہیراحمد طاہر صاحب کا نکاح عزیزم گُلریز سلیم ابن مکرم داؤد غنی صاحب (آف نوئے ہوف، جرمنی) کے ساتھ طے پایا۔

٭ عزیزہ نبیلہ افضل محمود(واقفہ نو)بنت مکرم راجہ محمد افضل صاحب (آف لاٹسن ، جرمنی) کا نکاح عزیزم ہارون محمود ابن مکرم حسین محمودصاحب(فرانکفرٹ، جرمنی) کے ساتھ طے پایا۔

٭ عزیزہ سِدرہ محمود بنت مکرم ناصرمحمود صاحب (آف فرانکفرٹ ،جرمنی ) کا نکاح عزیزم محمد یوسف(واقفِ نو) ابن مکرم یونس احمد صاحب(آف فرانکفرٹ ،جرمنی) کے ساتھ طے پایا۔

٭ عزیزہ عمارہ احمد بنت مکرم تنویراحمد صاحب (آف کاسل، جرمنی ) کا نکاح عزیزم نویداحمد (واقفِ نو) ابن مکرم محمد زاہد انور جاوید صاحب(آف یوکے) کے ساتھ طے پایا۔

٭ عزیزہ عنبر پروین بنت مکرم مدثراحمدخان صاحب (آف یوکے ) کا نکاح عزیزم ندیم احمد اسلم (واقفِ نو) ابن مکرم کلیم احمداسلم صاحب (شوال باخ ، جرمنی ) کے ساتھ طے پایا۔

٭ عزیزہ سائرہ سعیدبنت مکرم سعید تبسم صاحب (آف رُوسلزہائیم، جرمنی) کا نکاح عزیزم طاہر گُڈٹ (واقفِ نو) ابن مکرم راشد احمد گُڈٹ صاحب( آف فرانکفرٹ، جرمنی) کے ساتھ طے پایا۔

٭ عزیزہ منیزہ محمود بنت مکرم ثاقب نواز صاحب مرحوم (آف حورب،جرمنی) کا نکاح عزیزم عاطف محمود (واقفِ نو) ابن مکرم مظفراحمدمحمود صاحب (سابق مبلغ سپین، آف ریڈشٹڈ جرمنی) کے ساتھ طے پایا۔

٭ عزیزہ عظمیٰ کنول طور بنت مکرم رحمت اللہ شمس صاحب (آف وَیٹسلر،جرمنی) کا نکاح عزیزم اَلیمان نعیم (واقفِ نو)ابن مکرم محمد نعیم خالد صاحب (آف روڈگاؤ، جرمنی) کے ساتھ طے پایا۔

٭ عزیزہ رانا فاخرہ احمد بنت مکرم رانا ناصراحمد صاحب (آف روڈگاؤ، جرمنی )کانکاح عزیزم احمد نواز ناصر (واقفِ نو) ابن مکرم وسیم ناصر صاحب (آف ایش بورن، جرمنی) کے ساتھ طے پایا۔

٭ عزیزہ فارعہ کنول محی الدین بنت مکرم غلام محی الدین صاحب (آف ہاڈامار،جرمنی)کا نکاح عزیزم سفیراحمد (واقفِ نو ) ابن مکرم نذیراحمدصاحب(آف زواِسٹ، جرمنی) کے ساتھ طے پایا۔

٭ عزیزہ ملیحہ اسلم کُلّا بنت مکرم چوہدری محمد ارشدکُلّا صاحب (آف گولڈن شٹیڈ، جرمنی ) کا نکاح عزیزم ظہیراحمد (واقفِ نو ) ابن مکرم نذیر احمد صاحب (آف بَرگش گَلڈ باخ، جرمنی ) کے ساتھ طے پایا۔

٭ عزیزہ فاطمہ احمد بنت مکرم محمد ظفراللہ خان صاحب (آف نوٹلن، جرمنی ) کا نکاح عزیزم نبیل احمد (واقفِ نو) ابن مکرم مبشراحمدسلام صاحب (ہنوفر،جرمنی) کے ساتھ طے پایا۔

٭ عزیزہ زونارااُللہ بنت مکرم غضنفراللہ صاحب (آف اُوبراُرزل، جرمنی ) کا نکاح عزیزم ذیشان محمود (واقفِ نو) ابن مکرم خالد محمودصاحب(آف لیورکوزن، جرمنی )کے ساتھ طے پایا۔

٭ عزیزہ نائلہ احمد بنت مکرم مسعوداحمدگِل صاحب (آف روئٹ لِنگن ،جرمنی ) کا نکاح عزیزم چوہدری خُرم احمد مبشر ابن مکرم مبشراحمد صاحب (آف روئٹ لِنگن، جرمنی) کےساتھ طے پایا۔

٭ عزیزہ اِرم سدھو بنت مکرم محمد شہزادسِدھو صاحب (آف روئٹ لِنگن، جرمنی ) کا نکاح عزیزم نویداحمدبھٹی ابن مکرم منوراحمد بھٹی صاحب(آف فرائنس ہائم، جرمنی) کے ساتھ طے پایا۔

٭ عزیزہ ماہم محمود بنت مکرم خالد محمود صاحب (آف ویزبادن، جرمنی ) کا نکاح عزیزم سمیع اللہ ابن مکرم غضنفراللہ صاحب(آف اُوبَراُرزَل ، جرمنی ) کے ساتھ طے پایا۔

٭ عزیزہ ضُحیٰ باجوہ بنت مکرم محمد صالح باجوہ صاحب (آف ایگلزباخ ، جرمنی ) کا نکاح عزیزم ندیم احمد ابن مکرم وسیم احمد صاحب(آف فلورس ہائیم، جرمنی) کے ساتھ طے پایا۔

٭ عزیزہ ماریہ حسین بنت مکرم منورحسین صاحب (آف ہمبرگ،جرمنی ) کا نکاح عزیزم زوہیب ارشد ابن مکرم ارشدمحمود صاحب(آف کولون، جرمنی) کے ساتھ طے پایا۔

٭ عزیزہ سِدرہ نثاربنت مکرم نثاراحمد صاحب (آف وُرس بُرگ، جرمنی ) کا نکاح عزیزم ایازاحمد ابن مکرم مبشراحمد صاحب (آ ف ٹریبوؤر،جرمنی) کے ساتھ طے پایا۔

٭ عزیزہ ریشم بیگ بنت مکرم مرزاشمیم بیگ صاحب (آف حاؤرگرینزہاؤزن، جرمنی) کا نکاح عزیزم طلحہ اُللہ ابن مکرم چوہدری مجید اللہ صاحب (راٹنگن، جرمنی)کے ساتھ طے پایا۔

٭ عزیزہ نِیااحمدبنت مکرم مرزامسعوداحمد صاحب (آف فرانکفرٹ، جرمنی ) کا نکاح عزیزم تحریم ماجد ابن مکرم ماجد مسعود صاحب (آف گروناؤ،جرمنی ) کےساتھ طے پایا۔

٭ عزیزہ عروب خان بنت مکرم احمدسعید خان صاحب (آف اَیش بورن، جرمنی )کانکاح عزیزم شمائل احمد منہاس ابن مکرم محمد فاروق منہاس صاحب (آف فریدبرگ، جرمنی) کے ساتھ طے پایا۔

ان نکاحوں کا اعلان کرنے کے بعد حضورانور ایدہ اللہ تعالیٰ بنصرہ العزیز نے فرمایا:

’’اللہ تعالیٰ یہ نکاح جو مَیں نے آج پڑھائے ہیں ان کو ہرلحاظ سے بابرکت فرمائے اور دونوں میاں بیوی بھی اورخاندان بھی آپس میں پیار اور محبت سے رہنے والے ہوں اور گھروں کا سکون ہمیشہ اِن کا قائم رہے۔ ان کی ہمیشہ نیک نسلیں پیداہوتی رہیں۔ ‘‘

اس کے بعد حضورانور ایدہ اللہ تعالیٰ بنصرہ العزیز نے دعاکروائی۔

بعد ازاں حضور انور ایدہ اللہ تعالیٰ اپنی رہائشگاہ پر تشریف لے گئے۔

……………………

بلغاریہ کے وفد کی ملاقات

پروگرام کے مطابق ساڑھے پانچ بجے حضور انور ایدہ اللہ تعالیٰ بنصرہ العزیز مسجد کے مردانہ ہال میں تشریف لائے جہاں ملک بلغاریہ (BULGARIA) سے آنے والے وفد نے حضور انور ایدہ اللہ تعالیٰ سے ملاقات کی سعادت پائی۔ بلغاریہ سے امسال 56؍ افراد پر مشتمل وفد جلسہ سالانہ جرمنی میں شامل ہوا جن میں 31؍ افراد غیرازجماعت مہمان تھے۔

• ایک خاتون نے عرض کیا کہ میں پہلی دفعہ جلسہ میں شامل ہوئی ہوں اور جلسہ کے انتظامات سے بہت متاثر ہوئی ہوں۔ اپنے لئے اور سب عزیزوں کے لئے دعا کی درخواست کرتی ہوں۔

• ایک خاتون نے عرض کیا کہ میں بہت خوش قسمت ہوں کہ جلسہ میں شامل ہوئی ہوں۔ میں نے ایسی کانفرنس پہلے کبھی نہیں دیکھی۔ میں ان دنوں کو اپنی زندگی کے بہترین دن سمجھتی ہوں اور میں ہر طرح سے آپ کی مدد اور خدمت کرنے کے لئے تیار ہوں۔

• ایک مہمان خاتون نے عرض کیا کہ میں آپ کا شکریہ ادا کرتی ہوں۔ یہاں ہمارا بہت اچھی طرح خیال رکھا گیا۔ ہر ایک نے ہمیں سہولت پہنچائی۔ ہمیں حضور انور سے ملنے کا موقعہ ملا۔ حضور انور کے خطابات بہت مؤثر تھے۔ حضور ہمارے لئے دعا کریں کہ ہم برائی سے نجات پائیں اور اپنے دلوں میں تبدیلی پیدا کریں۔

اس پر حضور انور نے فرمایا۔ آپ بھی دعا کریں۔ ہم سب بھی آپ کے لئے دعا کریں گے۔

• ایک مہمان نے عرض کیا کہ میری حضور انور ایدہ اللہ تعالیٰ سے یہ دوسری ملاقات ہے۔ جلسہ سالانہ کا انتظام بہت اچھا تھا۔ میں آپ کا شکریہ ادا کرتا ہوں۔ میرے کچھ سوالات تھے جن کے جوابات مجھے حضور انور کی طرف سے مل گئے ہیں اور میری تسلی ہوگئی ہے۔میں بلغاریہ میں ہیومینٹی فرسٹ کا ممبر ہوں۔ ہم ہیومنٹی فرسٹ کے چیئرمین سے رابطہ کر رہے ہیں تاکہ بلغاریہ میں بھی مختلف پراجیکٹ شروع کئے جاسکیں۔

اس پر حضور انور نے فرمایا: ٹھیک ہے آپ رابطہ کریں۔ ہم کام کرتے رہیں گے۔

• ایک دوست نے سوال کیا کہ بلغاریہ میں جماعت کی رجسٹریشن ہونے والی ہے۔ کیا رجسٹریشن کے بعد صرف احمدی ہی اس میں شامل ہوں گے یا دوسرے لوگ بھی شامل ہوسکتے ہیں؟

• اس پر حضور انور نے فرمایا: اگر وہ احمدی نہیں ہیں اور ہم رجسٹریشن میں یہ ظاہر کریں کہ وہ احمدی ہیں تو پھر یہ غلط ہوگا، دھوکہ دینے والی بات ہے۔ اس لئے اگر تو مذہبی آرگنائزیشن کے طور پر جماعت رجسٹرڈ ہو رہی ہے پھر تو شامل نہیں ہوسکتے لیکن اگر کوئی چیرٹی آرگنائزیشن (Charity Organisation)کے طور پر رجسٹرڈ ہو رہی ہے تو پھر بعض شریف طبع لوگوں کو شامل کیا جاسکتا ہے۔

ممبرانِ وفد کے تأثرات

٭ اس وفد میں شامل ایک خاتون Kirilka صاحبہ نے اپنے تاثرات کا اظہار کرتے ہوئے کہا:

میں کئی پروگراموں میں شامل ہوئی ہوں لیکن جماعت احمدیہ کے اس جلسہ میں روحانی ماحول تھا۔ بہت پرسکون ماحول تھا جو اب رہتی زندگی تک سکون کا سامان ہے۔ لوگوں کے دلوں میں ہمارے لئے احترام اور محبت تھی۔ ان کی آنکھوں سے ان کے ایمان کا اندازہ ہوتا تھا کہ کیسے نیک لوگ ہیں۔ حضور کی تقاریر نے میرے دل پر بہت گہرا اثر کیا۔ میں تقریر کے دوران روتی رہی اور مجھے ایسا لگتا تھا کہ اب میری نئی زندگی شروع ہو رہی ہے۔ میں کوشش کروں گی کہ باقی زندگی آپ کے ارشادات کی روشنی میں گزاروں۔ میں آپ کی بہت شکرگزار ہوں کہ آپ نے اس روحانی ماحول سے فائدہ اٹھانے کا موقع دیا۔

٭ ایک عیسائی ڈاکٹر Manikatov صاحب نے اپنے تاثرات کا اظہار کرتے ہوئے کہا:

میں آپ کا بہت شکرگزار ہوں کہ آپ نے ہمیں ایسے روحانی ماحول میں بلایا۔ مہمانوں کا بہت احترام تھا ۔ نیکی پھیلانے کا شوق ہر کسی میں کوٹ کوٹ کر بھرا ہوا تھا ۔ میں نے حضور کی خدمت میں بعض سوالات بھجوائے تھے اور مجھے بہت اچھا لگا کہ حضور نے اپنی مصروفیات میں سے وقت نکال کر میرے سوالات کے جوابات بھجوائے۔

٭ ایک عیسائی خاتون Kracimira صاحبہ کہتی ہیں کہ:

میں اپنے خاوند اور بچوںکے ساتھ جلسہ میں شامل ہوئی ہوں۔ میں نے ایسی منظم مہمان نوازی پہلے کبھی نہیں دیکھی۔ والدین کا احترام، بچوں کی تربیت کے متعلق بہت کچھ سیکھا ہے۔اسے اب زندگی کا حصہ بناؤں گی۔ مرد حضرات جس طرح خواتین کا احترام کرر ہے تھے، یہ دیکھ کر بہت حیرانی ہوئی۔ عیسائیت میں عورتوں کے لئے اتنا عزت اور احترام میں نے نہیں دیکھا۔ شکریہ کے ساتھ ساتھ میں آپ کے لئے دعا گو ہوں۔

٭ ایک اَور عیسائی خاتون Walentina صاحبہ کہتی ہیں کہ:

میں پہلی دفعہ جلسہ میں شریک ہوئی ہوں۔ اتنے زیادہ لوگوں کو اکٹھے دیکھ کر اور ایک دوسرے کا احترام کرتے دیکھ کر بہت خوشی ہوئی۔ خاص طور پر آپ نے جو جبر کے خلاف تعلیم کا ذکر کیا ہےاس نے مجھے بہت متاثر کیا اور اسلام کے بارہ میں جو غلط فہمیاں پھیلائی جارہی ہیں، ان کی حقیقت واضح ہوگئی ہے اور اب اسلام کے بارے میں میرا دل مطمئن ہو گیا ہے۔

٭ ایک دوست محمد یوسف صاحب بھی اس وفد میں شامل تھے۔ انہوں نے کہا:

مَیں پہلی بار اس جلسہ میں شامل ہوا ہوں۔ جو باتیں جماعت کے خلاف سنی تھیں، جلسہ کا ماحول دیکھ کر اب میرا دل ہر لحاظ سے صاف ہو گیا ہے۔ سب طرف بھلائی اور قرآن و حدیث کی تعلیم تھی۔ آپ کے ماٹو ’محبت سب کے لئے اور نفرت کسی سے نہیں‘ نے مجھے بہت متاثر کیا۔ ہر طرف سکون ہی سکون تھا۔ خاص طور پر حضور کے آنے پر بہت سکون ملتا تھا۔ جلسہ کے دوران ہی میں نے فیصلہ کیا کہ اب میں بھی احمدیت میں داخل ہوتا ہوں۔ میری کافی ذاتی مشکلات تھیں لیکن جب میں جلسہ میں شامل ہوا تو میری مشکلات خود بخود دور ہونا شروع ہو گئیں۔ اب میں جماعت کے پیغام کو آگے پھیلاؤں گا۔

٭ ایک خاتون Anna صاحبہ نے کہا:

میں پہلی مرتبہ آئی ہوں۔ مجھے سب کچھ بہت اچھا لگا۔ خدمت کا بےلوث جذبہ دیکھ کر بہت اچھا لگا۔ اسی طرح بچوں کا پانی پلانا بہت اچھا تھا۔ علم میں بہت اضافہ ہوا۔

٭ ایک اور عیسائی خاتون Lilyana صاحبہ کہتی ہیں:

حضور کی تقاریر کا بہت گہرا اثر ہواہے۔ ہم خوش قسمت ہیں کہ آپ کے پاس آئے ہیں۔ ایک دوسرے سے ہمدردی ، حکومتوں کو سمجھانا اور آپ کے الفاظ ایسے تھے کہ اگر دنیا ان پر عمل کرے تو یہ دنیا بہت اچھی ہو جائے اور ایک پُر امن دنیا بن جائے۔ حضور ہماری فیملیز کے لئے دعا کریں۔

بلغاریہ کے وفد کی حضور انور ایدہ اللہ تعالیٰ بنصرہ العزیز کے ساتھ یہ ملاقات چھ بجے تک جاری رہی۔

آخر پر وفد کے ممبران نے حضور انور کے ساتھ تصاویر بنوانے کی سعادت پائی۔

……………………………

بوسنیا کے وفد کی ملاقات

بعدازاں بوسنیا (BOSNIA) سے آنے والے وفد نے حضور انور ایدہ اللہ تعالیٰ بنصرہ العزیز سے شرف ملاقات حاصل کیا:

بوسنیا سے امسال 59؍ افراد پر مشتمل وفد جلسہ جرمنی میں شامل ہوا۔

ایک مہمان نے عرض کیا کہ میں گزشتہ سال بھی جلسہ سالانہ پر آیا تھا، امسال بھی شامل ہوا ہوں۔ جلسہ میں دعاؤں کا موقعہ ملا ہے۔ گزشتہ سال میں نے حضور انور کی خدمت میں دعا کی درخواست کی تھی کہ میرے پاس کوئی کام نہیں ہے۔ ملازمت نہیں ہے۔ جب میں جلسہ سے واپس گیا تو مجھے جاتے ہی کام مل گیا۔ یہ سب حضور انور کی دعا کی برکت سے ہوا۔

ایک دوست نے عرض کیا کہ میرے دائیں ہاتھ پر زخم تھا۔ میں نے حضور انور ایدہ اللہ تعالیٰ سے مصافحہ کی سعادت پائی اور جب واپس گھر پہنچا تو مجھے زخم سے شفاء ہوچکی تھی۔ یہ سب کچھ مصافحہ کی برکت سے ہوا۔

ایک مہمان نے عرض کیا کہ خدا تعالیٰ مجھے اور میرے خاندان کے لوگوں کو صحت دے اور پریشانی سے بچاۓ اور مجھے دوبارہ توفیق دے کہ میں پھر آکر حضور انور سے ملوں۔

اس پر حضور انور نے فرمایا: اللہ تعالیٰ فضل فرمائے۔

ایک عمر رسیدہ شخص نے عرض کیا کہ میں خدا تعالیٰ کا شکر ادا کرتا ہوں کہ اُس نے مجھے اس عمر میں خلیفہ وقت کی زیارت کی توفیق عطا فرمائی ہے۔

ایک خاتون نے اپنی پریشانیوں سے نجات کے لئے دعا کی درخواست کی اس پر حضور انور نے فرمایا۔ اللہ تعالیٰ فضل فرماۓ۔

ایک خاتون نے عرض کیا کہ وہ سرکاری یتیم خانہ کی ڈائریکٹر ہیں۔ جماعت نے ان کے ساتھ کافی پراجیکٹ کئے ہیں۔ موصوفہ نے دعا کی درخواست کی کہ خدا تعالیٰ لوگوں کو عقل دے تاکہ سب مل کر خدمت کریں۔ حضورِانور نے فرمایا اس کے لئے ضروری ہے کہ انسان بے نفس ہو کر کام کرے۔

ایک مہمان نے عرض کیا کہ میڈیا میں اسلام کا غیراسلامی چہرہ دکھایا جاتا ہے اور اسلام کو بُرے رنگ میں پیش کیا جاتا ہے اس پر حضور انور نے فرمایا آپ کا سوسائٹی میں ایک سٹیٹس بھی ہے تو آپ مل کر کام کریں اور اس پراپیگنڈا کے خلاف آواز اٹھائیں۔

ایک مہمان نے حضور انور کی خدمت میں سلام عرض کیا اور بتایا کہ میں دو سال سے جماعت کے ساتھ پراجیکٹ کر رہا ہوں اور جماعت ان کے ساتھ مل کر ان کی مدد کرتی ہے۔ گزشتہ سال بھی جلسہ میں شامل ہوا تھا۔ اس سال بھی شامل ہونے کا موقع ملا ہے۔

٭ ایک دوست نے سوال کیاکہ کیاوجہ ہے کہ مسلمانوں میں اس قدر اختلافات ہیں۔ مسلمان دنیا ایک دوسرے کے خلاف ہے اور ایک دوسرے کے ساتھ ہی جنگ کررہے ہیں ۔ یہ صرف عرب ممالک کی بات نہیں بلکہ ساری دنیا میں ہی یہ صورتحال ہے۔ اس کی کیا وجہ ہے؟ حضورانور اس مسئلہ کو کس طرح دیکھتے ہیں اور اس کے بارہ میں کیا فرماتے ہیں؟

اس پر حضورانور ایدہ اللہ تعالیٰ بنصرہ العزیز نے فرمایا:

جماعت احمدیہ کے لئے اس مسئلہ کو دیکھناتو بہت سادہ اورsimple ہے۔ ہم تو یہ دیکھتے ہیں کہ آنحضرتﷺ نے پیش گوئی فرمائی تھی اور یہ حدیث تھی کہ ایک زمانہ آنحضرت ﷺ کی نبوت کاہوگا،اس کے بعد خلافتِ راشدہ کا زمانہ ہوگا، اس کے بعد ملوکیت پھیلے گی اور لمباعرصہ رہے گی اور اس کے بعد مسیح موعود اور مہدی معہود کا ظہور ہوگا۔ اور اس کے بعد اسلام کا revival ہوگااور ایک جماعت قائم ہوگی۔اور یہ بھی فرمایاتھاکہ اسلام کے اندر بہت سارے فرقے ہو جائیں گے اور اب ہم دیکھتے ہیں کہ گوکہ کہنے کو تو صرف دو بڑے فرقے ہیں سُنی اور شیعہ لیکن ان کے اندر پھر اتنی sub-division ہوئی ہے کہ ہرگروہ اپنے اپنے امام کو ہی حق پر سمجھتاہے۔ اوراس وجہ سے علماء میں آپس میں اختلافات ہیں۔ان اختلافات کی وجہ سے ان کی مسجدوں میں ان کے پیچھے مقتدی جو نمازیں پڑھنے کیلئے آتے ہیں ان کے ذہنوں پر ان اماموںکے خیالات راسخ ہوجاتے ہیں اور پھر ہر کوئی سمجھتاہے کہ ہم ٹھیک ہیں اور باقی سب غلط ہیں۔ اور پھر وہ یہ بھول جاتے ہیں کہ اسلام کی بنیادی تعلیم کیاہے ۔