منظوم کلام حضرت اقدس مسیح موعودعلیہ الصلوٰۃ والسلام (جلسہ سالانہ برطانیہ ۲۰۲۴ء کے افتتاحی اجلاس میں پڑھے جانے والے اشعار)

ہمیں اس یار سے تقویٰ عطا ہے

نہ یہ ہم سے کہ احسانِ خدا ہے

کرو کوشش اگر صدق و صفا ہے

کہ یہ حاصل ہو جو شرطِ لقا ہے

یہی آئینۂ خالق نما ہے

یہی اک جوہر سیف دعا ہے

ہر اک نیکی کی جڑ یہ اتّقا ہے

اگر یہ جڑ رہی سب کچھ رہا ہے

یہی اک فخر شان اولیاء ہے

بجز تقویٰ زیادت اِن میں کیا ہے

ڈرو یارو کہ وہ بینا خدا ہے

اگر سوچو، یہی دارالجزاء ہے

مجھے تقویٰ سے اس نے یہ جزا دی

فَسُبْحَانَ الَّذِیْ اَخْزَی الْاَعَادِیْ

عجب گوہر ہے جس کا نام تقویٰ

مبارک وہ ہے جس کا کام تقویٰ

سنو! ہے حاصلِ اسلام تقویٰ

خدا کا عشق مَے اور جام تقویٰ

مسلمانو! بناؤ تام تقویٰ

کہاں ایماں اگر ہے خام تقویٰ

یہ دولت تونے مجھ کو اےخدا دی

فَسُبْحَانَ الَّذِیْ اَخْزَی الْاَعَادِیْ