منظوم کلام حضرت مصلح موعودؓ (جلسہ سالانہ برطانیہ ۲۰۲۴ء کے اجلاس مستورات میں پڑھے جانے والے اشعار)

ایمان مجھ کو دے دے عرفان مجھ کو دے دے

قربان جاؤں تیرے قرآن مجھ کو دے دے

دل پاک کر دے میرا دنیا کی چاہتوں سے

سبّوحیت سے حصّہ سبحان مجھ کو دے دے

دل جل رہا ہے میرا فرقت سے تیری ہر دم

جامِ وصال اپنا اے جان مجھ کو دے دے

کر دے جو حق و باطل میں امتیازِ کامل

اے میرے پیارے ایسا فرقان مجھ کو دے دے

ہم کو تری رفاقت حاصل رہے ہمیشہ

ایسا نہ ہو کہ دھوکہ شیطان مجھ کو دے دے

وہ دل مجھے عطا کر جو ہو نثارِ جاناں

جو ہو فدائے دلبر وہ جان مجھ کو دے دے

جن پر پڑیں فرشتوں کی رشک سے نگاہیں

اے میرے محسن ایسے انسان مجھ کو دے دے

دجّال کی بڑائی کو خاک میں ملا دوں

قوّت مجھے عطا کر سلطان مجھ کو دے دے