تازہ ترین: شیخوپورہ میں احمدیوں کی قبروں کی بے حرمتی کا سلسلہ جاری

شیخوپورہ:احمدیوں کی قبروں کی بے حرمتی کا سلسلہ جاری۔انتظامیہ شرپسندوں کے خلاف کارروائی سے گریزاں

تھانہ سٹی فاروق آباد کی حدود میں احمدیہ قبرستان میں 21 اور 24جنوری کو کل 40 قبروں کے کتبے توڑے گئے۔

احمدیوں کے گھروں سمیت مختلف مقامات پر احمدیوں کے خلاف نفرت انگیز وال چاکنگ

21 جنوری کو تھانہ سٹی فاروق آباد ضلع شیخوپورہ میں 7 احمدیوں کی قبروں کے کتبوں کو نامعلوم شرپسندوں نے توڑ دیا۔نیز احمدیوں کے گھروں کے باہر نفرت انگیز وال چاکنگ کی گئی جس کے بارہ میں پولیس کو رپورٹ کی گئی ۔جس پر کچھ جگہوں پر وال چاکنگ ختم کروا دی گئی۔شرپسند عناصر کے خلاف کارروائی نہ ہونے پر ان کے حوصلے مزید بلند ہوئے اور 24جنوری کی رات کو شر پسندوں نےاسی قبرستان میں مزید33 کتبوں کو توڑدیا۔ اس طرح 40 کتبوں کو نقصان پہنچایا گیا ہے ۔ یہ قبرستان 35 سال پرانا ہے۔

ترجمان جماعت احمدیہ پاکستان عامر محمود نے محب وطن اور پر امن احمدیوں کے خلاف نفرت انگیز وال چاکنگ اور احمدیہ قبرستان میں 40 احمدیوں کی قبروں کی بے حرمتی کی شدید مذمت کرتے ہوئے کہا ہے کہ انتظامیہ شرپسند عناصر کو روکنے سے گریزاں ہے۔جب چند دن پہلے احمدیوں کی قبروں کے کتبے توڑے گئے اور اشتعال انگیز وال چاکنگ کی گئی تو انتظامیہ کو ان شرپسندوں کو گرفت میں لینا چاہیئے تھا جو سرعام احمدیوں کے خلاف وال چاکنگ کر رہے تھے۔ترجمان نے مطالبہ کیا کہ عقیدے کے اختلاف کی بنا پر احمدیوں کے خلاف نفرت انگیز وال چاکنگ کرنے والوں اور احمدیوں کی قبروں کی بے حرمتی کرنے والوں کو قانون کے کٹہرے میں لایا جائے۔