حفظ القرآن سکول کینیڈا کی سالانہ کھیلیں ۲۰۲۴ء
اللہ تعالیٰ کے فضل و احسان سے مورخہ ۲؍اکتوبر ۲۰۲۴ء بروزبدھ حفظ القرآن سکول، کینیڈا میں سالانہ کھیلوں کا انعقاد کیا گیا۔
صبح ساڑھے آٹھ بجے اسمبلی میں تلاوت قرآن کریم کے بعد طلبہ کو کھیلوں کے متعلق ہدایات دی گئیں۔ انفرادی مقابلوں مثلاً سو میٹر دوڑ، ٹیبل ٹینس اور بیڈ منٹن کے ليے طلبہ کو جونیئر اور سینئر گروپس میں تقسیم کیا گیا تھا۔اجتماعی مقابلوں مثلاً باسکٹ بال، فٹ بال، رسہ کشی اور ریلے ریس کے ليے طلبہ کو تین مختلف احزاب امانت، دیانت اور شجاعت میں تقسیم کر کے تین ٹیمیں بنائی گئیں۔ تینوں گروپس کےليے مختلف رنگوں کی شرٹس کا بھی اہتمام کیا گیا تھا۔تمام طلبہ نے نہایت جوش و خروش کے ساتھ کھیلوں میں حصہ لیا۔
دوپہر ساڑھے بارہ بجے اختتامی تقریب منعقد ہوئی جس میں مکرم داؤد احمد حنیف صاحب پرنسپل جامعہ احمدیہ کینیڈا اور مکرم مختار احمد چیمہ صاحب نائب پرنسپل نے مع چند اساتذہ جامعہ شرکت کی۔ مکرم پرنسپل صاحب نےطلبہ کو نصائح کرتے ہوئے کہا کہ علمی میدان میں ترقی کرنے کے ساتھ ساتھ اپنی جسمانی صلاحیتوں کوبھی بڑھانے کی ہمیشہ کوشش کرتے رہیں تاکہ جماعت کی بہترین رنگ میں خدمت کر سکیں اور سلسلہ کی ترقی میں ممدو معاون ثابت ہوں۔ اس کے بعد مکرم پرنسپل صاحب نے ورزشی مقابلہ جات میں نمایاں پوزیشن حاصل کرنے والے طلبہ کو انعامات دیے۔
اختتامی تقریب کے بعد تمام شاملین کی کھانے کے ساتھ تواضع کی گئی۔
(رپورٹ: حافظ راحت احمد چیمہ۔ استاد حفظ القرآن سکول، کینیڈا)
