عطا کیجیے آبروئے مدینہ

عطا کیجیے آبروئے مدینہ
کہ ہر وقت نظریں ہوں سُوئے مدینہ

دل و جاں سے بڑھ کر بیاں سے ہے باہر
مجھے سب سے پیارا ہے رُوئے مدینہ

یہی آرزو ہے رہے مجھ کو حاصل
وہی خاکِ پا اور کُوئے مدینہ

اِن اشکوں پہ مت جا یہ آنسو نہیں ہیں
رواں ہے محبّت میں جُوئے مدینہ

تصوّر میں ہیں آپؐ ہی آپ ہر دَم
سمائی ہے سینے میں بُوئے مدینہ

اِسی واسطے آنکھ رہتی ہے پُرنَم
کہ رکھتی ہے خُو میں یہ خُوئے مدینہ

مدینے کی گلیوں میں گُم کر کے خود کو
جُنوں بھی کرے جستجوئے مدینہ

یہ شمعِ فروزاں ہے بجھنے نہ پائے
کہ روشن رہے آرزوئے مدینہ

(ڈاکٹر عبد الکریم خالد)

مزید پڑھیں: رمضان میں مَیں تیرا بھرم مانگ رہا ہوں