ربوہ کا موسم( ۷؍تا۱۳؍مارچ ۲۰۲۵ء)

مورخہ ۷؍مارچ جمعۃ المبارک کی نماز فجر کے وقت آسمان صاف تھا، دوپہر سے قبل کچھ دیر کے ليے ہلکی ہوا چلنا شروع ہوئی اور کسی قدر بادل بھی چھا گئے۔ ہلکے بادلوں کی وجہ سے دن بھر سورج نہیں نکلا جس سےسردی محسوس ہوتی تھی۔ ٹمپریچر زیادہ سے زیادہ ۲۲؍۔ اور کم سے کم ۱۳؍ درجہ سینٹی گریڈ تھا۔ ہفتہ والے دن آسمان صاف تھا۔ چمکتی دھوپ کی وجہ سے گرمی محسوس ہوتی تھی۔ اتوار کو نماز فجر کے وقت خنکی تھی اور موسم صاف تھا، سوموار کو بادلوں کی ہلکی تہ آسمان پر چھائی ہوئی تھی، سارا دن ہوا نے سما ںباندھے رکھا۔ منگل کو بھی موسم صاف تھا اور سورج خوب چمک رہا تھا، اب گرمی نےاپنی موجودگی کا اظہارکرنا شروع کردیا ہے۔

اس کے ساتھ ساتھ موسم بہار کی آمدسے ہر طرف رونق اور چہل پہل شروع ہوگئی ہے، رنگ برنگے پھول کھلے نظر آتے ہیں، ربوہ کی صدرشاہراہیں اور دفاتر رنگین پھولوں سے سبزہ زار بن گئے ہیں۔ اس پر مستزاد یہ کہ پرندوں کی چہچہاہٹ اور شور سے فضا میں نغمگی رچ بس گئی ہے، اور موسم بہار کی خوشگوار ہوا چلنے سے قدرے سکون محسوس ہوتا ہے اور موسم معتدل بن جاتا ہے، بدھ کو آسمان صاف تھا، صبح ہی سے ہلکی بادِ نسیم رواں دواں تھی، دوپہر کے بعد ہوا میں تیزی آگئی جس کا سلسلہ شام تک جاری رہا۔ ٹمپریچر زیادہ سے زیادہ ۲۴؍اور کم سے کم۱۳؍درجہ سینٹی گریڈ تھا۔ جمعرات کو آسمان بالکل صاف تھا ہلکی ٹھنڈی ہو ا کی وجہ سے خنکی بنی رہی۔ دوپہر کے وقت ہوا کی رفتار میں اضافہ ہوگیا، جو رات گئے تک جاری رہا۔ رات دو بجے کے قریب ہلکی بارش نے چھڑکاؤ کردیا اور ساتھ ٹھنڈی ہوا کی وجہ سے سردی محسوس ہوتی تھی۔ (ابو سدید)

مزید پڑھیں: رمضان المبارک کی آمد اور حالات حاضرہ