’عربی زبان اور کیلیگرافی‘ کے موضوع پرلندن کے Battersea Arts Centre میں خصوصی نمائش
اللہ تعالیٰ کے فضل سے لجنہ اماء اللہ Earlsfield یوکے، نیشنل شعبہ تبلیغ یوکے اور ریویوآف ریلیجنزکی ٹیموں کے زیر اہتمام لندن میں قائم Battersea Arts Centre میں ایک خصوصی نمائش ’عربی زبان اور کیلیگرافی‘ کے موضوع پر مورخہ ۱۱ تا ۱۵؍فروری ۲۰۲۵ء کو لگائی گئی۔ نیز یہاں پر ریویو آف ریلیجنز کے القلم پراجیکٹ کے تحت نمائش دیکھنے والے زائرین کے لیے قرآن کریم کی ایک آیت کریمہ اپنے ہاتھ سے لکھنے کا موقع فراہم کیا گیا تھا۔
لجنہ اماء اللہ Earlsfield کی انتظامیہ کی ایک رکن نے نمائش کا پس منظر بیان کرتے ہوئے بتایا کہ لجنہ اماء اللہ کے تبلیغی سلیبس میں مختلف عالمی دنوں کے موقعوں پر نمائش وغیرہ لگانے کی تلقین کی گئی ہے۔ چنانچہ ہم نے نمائش لگانے کی غرض سے مختلف Venuesسے رابطہ کیا۔ اللہ تعالیٰ کے فضل سے ہمیں Battersea Arts Centre کی طرف سے وہاں پر پانچ دنوں کے لیے ’کیلیگرافی‘ سے متعلق نمائش لگانے کی آفر ہوئی جسے ہم نے بخوشی قبول کرلیا۔ اس وقت ہمیں بالکل معلوم نہیں تھا کہ ہم نے کیا کرنا ہے اور کس طرح نمائش لگانی ہے۔ چنانچہ لجنہ اماء اللہ کی نیشنل ٹیم سے اس بارے میں راہنمائی لی گئی۔ انہوں نے نیشنل شعبہ تبلیغ یوکے سے رابطہ کیا جنہوں نے ہماری خصوصی معاونت کی۔ نیز کیلیگرافی کے سلسلے میں مایہ ناز احمدی خطاط مکرم رضوان بیگ صاحب سے رابطہ ہوا جنہوں نے ہمارے ساتھ مکمل تعاون کیا اور ’عربی زبان اور کیلیگرافی‘ سے متعلق خصوصی نمائش لگائی۔ خلاصہ کلام یہ کہ اللہ تعالیٰ نے اپنے فضل سے خود ہی سے سب کام سرانجام دیے اور ہم یہ سوچ کر حیران ہوجاتے ہیں کہ کس طرح حضور انور کی دعاؤں کے نتیجے میں سب راستے کھلتے گئے اور تمام امور احسن طریق پر انجام پائے۔
اس نمائش کو روزانہ کی بنیاد پر مختلف لوگ اور گروپس دیکھنے کے لیے تشریف لائے۔ ایک محتاط اندازے کے مطابق ۵۰۰ سے زائد مہمانوں نے نمائش کو وزٹ کیا۔ اسی طرح ۳۵۰ کے قریب احمدی احباب و خواتین نے اس تاریخی نمائش سے فائدہ اٹھایا۔ اللہ تعالیٰ اس کاوش کے نیک نتائج پیدا فرمائے اور سعید روحوں کی اسلام احمدیت کی طرف رہنمائی فرمائے۔
(رپورٹ: احسن مقصود۔ الفضل انٹرنیشنل)
