نعت خیرالبشرصلی اللہ علیہ وسلم
(حضرت سیّدہ نواب مبارکہ بیگم صاحبہ رضی اللہ تعالیٰ عنہا)
السّلام! اے ہادیٔ راہِ ہدیٰ جانِ جہاں
والصّلوٰۃ! اے خیر مطلق اے شہِ کون و مکاں
تیرے ملنے سے ملا ہم کو وہ ’’مقصودِ حیات‘‘
تجھ کو پا کر ہم نے پایا ’’کامِ دل‘‘ آرامِ جاں
آپ چل کر تو نے دکھلا دی رہِ وصلِ حبیب
تو نے بتلایا کہ یوں ملتا ہے یارِ بے نشاں
ہے کشادہ آپ کا بابِ سخا سب کے لئے
زیرِ احساں کیوں نہ ہوں پھر مرد و زَن پیر و جواں
تشنہ روحیں ہو گئیں سیراب تیرے فیض سے
علم و عرفانِ خداوندی کے بحرِ بیکراں!
ایک ہی زینہ ہے اب بامِ مرادِ وصل کا
بے ملے تیرے ملے ممکن نہیں وہ دل ستاں
تو وہ آئینہ ہے جس نے منہ دکھایا یار کا
جسمِ خاکی کو عطا کی روح اے جانِ جہاں
تا قیامت جو رہے تازہ تری تعلیم ہے
تو ہے روحانی مریضوں کا طبیبِ جاوداں
ہے یہی ماہِ مبیں جس پر زوال آتا نہیں
ہے یہی گلشن جسے چھوتی نہیں بادِ خزاں
’’کوئی راہ نزدیک تر راہِ محبت سے نہیں‘‘
خوب فرمایا یہ نکتہ مہدیٔ آخر زماں
خخیہ دعا ہے میرا دل ہو اور تیرا پیار ہو
میرا سر ہو اور تیرا پاک سنگِ آستاں
(درّعدن صفحہ ۲۰۔ ۲۱)
مزید پڑھیں: نونہالانِ جماعت مجھے کچھ کہنا ہے
