جماعت احمدیہ جرمنی کے اڑتالیسویں جلسہ سالانہ کی تیاری کا آخری روز
(۲۲؍اگست ۲۰۲۴ء، نمائندہ الفضل انٹرنیشنل) جماعت احمدیہ جرمنی کے جلسہ سالانہ کی تیاری کے سلسلہ میں کیے جانے والے وقار عمل کا آج آٹھواں دن تھا۔ کل شام سے مہمانوں کی آمد شروع ہو گئی تھی جن کو اجتماعی قیام گاہوں میں ٹھہرایا گیا۔ ۶۵ فیملیز کے افراد نے ذاتی خیمہ جات لگا کر رات بسر کی اور نئی جگہ روحانی ماحول میں شب باری سے لطف اندوز ہوئے۔ کل ۱۲۰۰ افراد نے جلسہ گاہ میں قیام کیا۔ ساری رات مردانہ جلسہ گاہ کے سٹیج اور بینرز آویزاں کرنے کا کام جار ی رہا۔
صبح نماز فجر سوا پانچ بجے باجماعت ادا کی گئی جو متعلم جامعہ احمدیہ عزیزم مجاہد احمد نے پڑھائی اور بعد ازاں نماز باجماعت کی اہمیت پر درس دیا۔
آج تیاری کا آخری دن تھا اس لیے مخلصین ناشتہ سے جلد فارغ ہو کر اپنے اپنے کام میں منہمک ہوگئے۔ دوپہر تک شعبہ جات کے کارکنان بھی اپنے اپنے شعبہ کے دفاتر میں متحرک نظر آئے۔
جلسہ گاہ کا ابتدائی منظر بہت بھلا لگ رہا تھا۔ ظہر سے قبل مستورات کی جلسہ گاہ کا کام مکمل کر لیا گیا۔ ٹیکنیکل امور کو چیک کر لیا گیا۔ مردانہ جلسہ گاہ میں بھی آواز اور بڑی سکرینز کے بارے میں پوری تسلی کر لی گئی۔ سیکیورٹی کی ٹیمیں اپنی جگہ مستعد اور اپنی تیز نگاہوں سے جلسہ گاہ کا احاطہ کیے ہوئے تھیں۔ انٹری کارڈ کی نظامت بیرون از جرمنی سے آنے والے مہمانوں کے کارڈ بنانے میں مصروف تھی۔ ظہر سے قبل جلسہ گاہ کا جاذب نظر منظر ہر ایک کو اپنی طرف متوجہ کر رہا اور چہروں پر مسکراہٹیں بکھیر رہا تھا۔
تین بجے نماز ظہر و عصر ادا کی گئی جس کی امامت مولانا شمشاد احمد قمر صاحب پرنسپل جامعہ احمدیہ جرمنی نے کروائی۔ افسر جلسہ سالانہ مکرم محمد الیاس مجوکہ صاحب نے بعض ضروری ہدایات دیں۔ مکرم نیشنل امیرصاحب نے سیکورٹی کے حوالہ سے ہر ایک کو اپنی ذمہ داری کا احساس دلایا۔
نمازوں کے بعد ناظم تیاری جلسہ گاہ نے تمام ناظمین کے ساتھ شام چھ بجے ہونے والے معائنہ
کے حوالے سے میٹنگ کی۔ آج شام کو مکرم امیر صاحب جلسہ گاہ کا تفصیلی معائنہ کریں گے۔ جلسہ سالانہ کے کارکنان کے ساتھ ایک تقریب بھی منعقد ہوگی لیکن پیارے امام کی کمی کو ہر کارکن اور ہر مہمان محسوس کر رہا ہے اور حضور انور کی صحت اور فعال زندگی اور درسی عمر کے لیے دعا گو ہے۔
