متفرق شعراء
شانِ مصطفوی صلی اللہ علیہ وسلم
تُو تو ہے سب سے عُلُو شان مدینے والے!
‘‘تجھ پہ سو جان سے قربان مدینے والے!’’
ہر نبی تیری خبر دیتا رہا ہے صدیوں
سب رہے تیرے ثناخوان، مدینے والے!
جہل کی تیرہ شبی نور سے زائل کر دی
تو نے کی زندگی آسان مدینے والے!
صاحبِ عقل و فراست ہو سراپا رحمت
حسن و احسان کی ہو کان مدینے والے!
اے کہ تُو ختم رُسل، والئ کُل، جائے پنہ
سب ترے تابعِ فرمان، مدینے والے!
اے مرے شاہد و مشہود، مرے ماہِ منیر
معدنِ رأفت و احسان مدینے والے!
شعر در شعر دبستانِ ادب کھل اٹھا
وجد میں آ گئے مستان، مدینے والے!
آدمؑ و لوطؑ و براہیمؑ ہوں، موسیٰؑ عیسیٰؑ
سب دل و جان سے قربان، مدینے والے
(احمد منیب)
