اسماء النبیﷺ فی القرآن : قسط نمبر 5

14 دسمبر 2018ء

0 پڑھنے کے لئے 11 منٹ

(حافظ محمد نصراللہ جان۔ استاد جامعہ احمدیہ ربوہ)

17۔نَذِیْرٌ ﷺ:

قرآن کریم میں بارہا آنحضرتﷺ کو نذیر کے نام سے یاد فرمایا گیا۔ سب سے پہلے سورة البقرہ میں آپﷺ کو مخاطب کرتے ہوئے فرمایا إِنَّا أَرْسَلْنَاكَ بِالْحَقِّ بَشِيرًا وَنَذِيرًا وَلَا تُسْأَلُ عَنْ أَصْحَابِ الْجَحِيمِ (البقرۃ120:) ترجمہ : ىقىناً ہم نے تجھے حق کے ساتھ بشىر اور نذىر کے طور پر بھىجا ہے اور تجھ سے جہنّم والوں کے بارہ مىں نہىں پوچھا جائے گا۔ یعنی آپ ﷺ کا فرضِ منصبی صرف پیغام بخوبی پہنچادینا ہے۔ پیغامِ الٰہی ماننے والوں کو خوشخبری دیں اور نہ ماننے والوں کو برے انجام سے ڈرائیں۔ دین میں کوئی جبر نہیں اس لئے آپﷺ کسی پر نگران اور وکیل نہیں نہ ہی کسی فرد کے اعمال کے ذمہ دار ہیں۔ اس لئے اس عظیم الشان پیغام کو کوئی مانے یا نہ مانے، تکفیر کرنے والوں اور اپنے اعمال کی وجہ سے جہنم میں جانے والوں کے متعلق آپﷺ سے جواب طلب نہیں کیا جائیگا۔

قرآن کریم میں کئی مقامات پر آپﷺ کی بعثت اور نزول قرآن کا مقصد ہی پیغام پہنچانا بتایا گیا ہے۔ ایک جگہ فرمایا: وَأُوحِيَ إِلَيَّ هٰذَا الْقُرْآنُ لِأُنْذِرَكُمْ بِهٖ وَمَنْ بَلَغَ (الانعام 20:) ترجمہ: اور مىرى طرف ىہ قرآن وحى کىا گىا ہے تا کہ مىں اس کے ذرىعہ سے تمہىں ڈراؤں اور ہر اُس شخص کو بھى جس تک ىہ پہنچے۔ ایک اور جگہ فرمایا: تَنْزِيلَ الْعَزِيزِالرَّحِيمِ۔ لِتُنْذِرَ قَوْمًا مَّا أُنْذِرَ آبَاؤُهُمْ فَهُمْ غَافِلُونَ (يٰس 6:-7) ترجمہ: بار بار رحم کرنے والے کى تنزِىل (ہے)۔ تاکہ تُو اىک اىسى قوم کو ڈرائے جن کے آباءواجداد نہىں ڈرائے گئے پس وہ غافل پڑے ہىں۔ بعض مقامات پر حصر کے ساتھ بیان فرمایا کہ آپﷺ کی آمد کا مقصد صرف اِبلاغ ہے۔ فرمایا: اِنَّمَا أَنْتَ نَذِيرٌ وَاللَّهُ عَلٰى كُلِّ شَيْءٍ وَّكِيلٌ (هود 13:) ترجمہ: تُو محض اىک ڈرانے والا ہے اور اللہ ہر چىز پر نگران ہے۔

صحیح بخاری میں درج ہے کہ جب آیت کریمہ وَأَنْذِرْ عَشِيرَتَكَ الْأَقْرَبِينَ (الشعراء 215:) نازل ہوئی تو آپﷺ کوہِ صفا پر تشریف لے گئے اور قبیلہ قریش کی ایک ایک شاخ کو بلایا اور کہا کہ مَیں تم لوگوں کو آنے والے شدید عذاب سے ڈراتا ہوں۔ اس پر ابو لھب نے آپﷺ کے لئے سخت الفاظ استعمال کئے۔

(مفہوم حدیث از صحیح بخاری کتاب التفسیر باب قولہ وَأَنْذِرْ عَشِيرَتَكَ الْأَقْرَبِينَ)

اس کے بعد آپ ﷺ اللہ تعالیٰ کے حکم سے جگہ جگہ تشریف لے جاکر اللہ تعالیٰ کی پاک ہستی سے تعلق قائم کرنے کی دعوت دیتے اور تکذیب کی صور ت میں عذاب الٰہی سے خوف دلاتے۔ کبھی صحن کعبہ میں، کبھی سرداران قریش کے پاس، کبھی حج کے ایام میں، کبھی عرب کے میلوں میں، کبھی قبائل کے پاس جا جاکر منادی دیتے اور پھر سفر طائف کا حال تو ہم سب جانتے ہیں۔ ہمارے پیارے آقا ﷺ کو دعوت الی اللہ کی اس قدر تڑپ تھی کہ ہجرت مدینہ کے دوران سخت خوف کے ایام میں بھی راستہ میں ملنے والوں کو دعوت الی اللہ کی روایات ملتی ہیں۔ مدینہ پہنچ کر بھی اردگرد کے قبائل کو انذار و تبشیر فرماتے رہے۔ صحابہ ؓ پر مشتمل وفود قبائل کو بھی بھیجے جاتے تھے اور قبائل کے وفود خود بھی خدمتِ اقدس میں حاضر ہوتے۔ واقعہ رجیع میں شہید ہونے والے صحابہؓ بھی دعوت الی اللہ کے لئے ہی تشریف لے جارہے تھے۔

آپﷺ نذیر تھے لیکن قوم کے انکار اور سخت تکالیف دینے پر عذاب الٰہی کے مانگنے میں جلدی نہ کی۔ سفر طائف میں اہل طائف کے برے سلوک سے موزے بھی خون مبارک سے بھر گئے، شدید تکلیف کی حالت میں ایک باغ میں پناہ لی۔ فرشتے حاضر ہوئے اور پیشکش کی کہ آپؐ چاہیں تو اس بستی کو پہاڑوں کے درمیان پیس ڈالا جائے۔ لیکن رحمة للعالمین کی رحمت تکلیف پر غالب آئی اور ان کے ایمان کی دعا کی۔ صرف یہیں پر بس نہیں ہوا۔ فتح مکہ کے بعد اسی بستی طائف کا محاصرہ کیا۔ بیس دن سے زائد محاصرہ کرکے جب اہل طائف اس قدر تنگ آگئے کہ کسی بھی وقت ہتھیار ڈال سکتے تھے، محاصرہ اٹھا لیا اور واپس چل دیئے۔

ضورﷺ کی زندگی میں شاید یہ واحد موقع ہے جہاں آپﷺ نے خود ہی میدان جنگ سے فتح کے بغیر واپسی کی ہو۔ لیکن اس طریق کار سے ایسی فتح نصیب ہوئی کہ اہل طائف خود چل کر آئے اور اسلام قبول کرلیا۔ دنیا کا کوئی اور فاتح ہوتا تو ایسی بستی پر پہنچ کر اپنے پرانے زخموں کو یاد کرتا اور ان لوگوں کو عبرتناک سزا دیتا۔ لیکن آپﷺ کے رحمت بھرے انذار کا یہ پہلو کائنات نے نہ کبھی دیکھا تھا نہ دیکھے گی۔

آنحضرتﷺ نے فرمایا کہ میری اور لوگوں کی مثال ایک ایسے شخص کی ہے جس نے آگ روشن کی، جب اس کے اردگرد کا حصہ روشن ہوگیا تو پروانے اور کیڑے مکوڑے جو آگ پر گرتے ہیں اس میں گرنے لگے اور آگ جلانے والا انہیں اس میں سے نکالنے لگا لیکن وہ اس کے قابو نہیں آئے اور آگ میں گرتے رہے۔ اسی طرح میں تمہاری کمر پکڑ کر تمہیں آگ سے نکالتا ہوں اور تم ہو کہ اس میں گرے جاتے ہو۔

(صحیح بخاری کتاب الرقاق باب الانتھاء عن المعاصی)

آپﷺ کے انذار کی وجہ سے قوموں کی اصلاح اور تباہی سے بچنے کا منظر قرآن کریم اس طرح بیان فرماتا ہے: وَكُنْتُمْ عَلىٰ شَفَا حُفْرَةٍ مِنَ النَّارِ فَأَنْقَذَكُمْ مِنْهَا (آل عمران 104:) ترجمہ: اور تم آگ کے گڑھے کے کنارے پر (کھڑے) تھے تو اس نے تمہىں اس سے بچا لىا۔

اللہ تعالیٰ نے اپنے پیارے رسولﷺ کے ذریعہ ہی بنی نوع انسان کو تباہی سے بچایا۔ آپﷺ کی آمد سے قبل وہ اہل دنیا جو فسق و فجور اور ہر قسم کی برائی سے بھرے ہوئے تھے ، آپﷺ کے انذار اور پھر قوت قدسیہ کے زیر اثر ایسے ہوگئے کہ ان کی تعریف اصحابی کالنجوم ( میرے صحابہ ستاروں کی مانند ہیں) کے الفاظ میں کی گئی۔

18۔رَؤٗفٌ ﷺ:

اللہ تعالیٰ نے قرآ ن کریم میں 11 مرتبہ اس صفت کا ذکر فرمایا ہے جن میں سے 10 مرتبہ اپنی ذات کے لئے اور ایک مرتبہ سورة التوبہ میں یہ صفاتی نام اپنے سب سے پیارے نبی حضرت محمدﷺ کے لئے استعمال فرمایا۔ رؤوف کے معنی نہایت مہربان کے کئے جاتے ہیں۔ آنحضرتﷺ کی شفقت اور مہربانیاں زندگی کے ہر پہلو میں نظر آتی ہیں۔ رسالت کے فرائض کی ادائیگی میں اس قدر مہربان ہیں کہ باری تعالیٰ باخع نفسک (اپنی جان کو ہلاک کرلینے والا) کہہ اٹھتا ہے۔ قرآن کریم آپﷺ کی مومنوں سے محبت و رأفت کے متعلق فرماتا ہے:

النَّبِيُّ أَوْلٰى بِالْمُؤْمِنِينَ مِنْ أَنْفُسِهِمْ (الأحزاب 7:)

مؤلف کان خلقہ القرآن لکھتے ہیں:’’ اگر قرآن کہتا ہے کہ النبی اولیٰ بالمومنین من انفسھم کہ نبی مومنوں پر ان کی اپنی جانوں سے زیادہ شفیق ہے یا زیادہ قریب ہے، زیادہ حقدار ہے تو عملی زندگی میں جہاں ہمیں یہ نظرآتا ہے کہ آپؐ کے صحابہؓ اپنی جانوں کے مقابلہ میں آپؐ پر جان و مال و تن بڑھ بڑھ کے نثار کرتے تھے وہاں آپؐ کی شفقت اور محبت اور رہنمائی اور مشورہ ان کے لئے ان کی اپنی زندگی میں زیادہ مفید اور بابرکت ثابت ہوتی۔ ایک بیوہ کو شادی کے متعدد پیغامات آتے ہیں۔ آپؐ ان سب کو ردّ کرتے ہوئے اس خاتون کے لئے ایک اور رشتہ کا مشورہ دیتے ہیں اور خاتون اس کو ناپسند کرتے ہوئے بھی آپؐ کا ارشاد قبول کر لیتی ہے اور پھر ساری عمر قابلِ رشک زندگی گزارتی ہے۔ ایک شخص کو تجارتی برکت کے لئے دعا دیتے ہیں اور وہ محاورةً خاک بھی لیتا ہے تو اس میں بھرپور نفع کماتا ہے۔ ایک چھوٹی سی بچی کو لباس تحفہ دیتے ہوئے ابلی اخلقی کی دعا دیتے ہیں تو اس کو لمبی صحت مند عمر ملتی ہے۔ ایک بارہ تیرہ سال کے لڑکے کو خدمت کے طور پر پانی کی چھاگل بھر کر رکھنے پر گلے لگا کر دعا دیتے ہیں اللھم علمہ الکتاب تو 14 سو سال میں امت محمدیہ میں تفسیر کے موضوع پر لکھے جانے والی ہر کتاب میں ان کے علم تفسیر کا تذکرہ ہوتا ہے۔ ایک موذی دشمن کے خلاف ایک نوجوان کو کمانڈر بنا کر بھیجتے ہیں۔ وہ عرض کرتا ہے حضور میں گھوڑے پر ٹک نہیں سکتا گھوڑے سے گر جاتا ہوں آپؐ اس کے سینہ پر اپنا دستِ مبارک مارتے ہیں اور نوجوان بیان کرتے ہیں کہ مَیں پھر کبھی گھوڑے سے نہیں گرا۔ ایک نوجوان نے نئی نئی شادی کی ہے وہ غزہ سے واپس گھر جانے کی کوشش میں ہیں مگر ان کا اونٹ چلنے کا نام نہیں لیتا۔ آپ ایک سوٹی کی نوک اس اونٹ کو لگاتے ہیں اور وہ اتنا تیز ہو جاتا ہے کہ سوار روکتا ہے اور اونٹ رکتا نہیں ۔ ایک خاتون اپنے ہاتھ سے بُن کر ازار پیش کرتی ہیں۔ آپؐ ضرورت مند ہیں اس کو پہن کرتشریف لاتے ہیں کہ مانگنے والا آپؐ سے وہ مانگ بیٹھتا ہے۔ آپ کبھی سائل کو ردّ نہیں کرتے، اندر تشریف لے جاتے ہیں اور طے کر کے وہ لباس اس شخص کو بھجوا دیتے ہیں۔ مدینہ میں وبا پھیلتی ہے آپﷺ دارًا و دارًا و بیتًا و بیتًا گھر گھر اور کمرہ کمرہ میں تشریف لے جا کر بیماروں کی عیادت فرماتے ہیں۔ گلے کی تکلیف کی وجہ سے عرب کے لوگ بچوں کا جو علاج کرتے ہیں اس سے بچے کو تکلیف ہوتی ہے۔ آپؐ منع فرماتے ہیں کہ بچوں کو تکلیف کیوں دیتے ہوقسط سے علاج کرو۔ عرب کے لوگ گرم گرم لوہے سے داغ لگا کر علاج کیا کرتے تھے آپ کی شفیق و رحمدل طبیعت نے اپنے متبعین کو اس سے منع فرما دیا۔

حضرت ابو ہریرہ ؓ بیان کرتے ہیں کہ مَیں نے عرض کیا حضورؐ میں آپ سے بہت سے ارشادات سنتا ہوں مگر بھول جاتا ہوں۔ فرمایا اپنی چادر پھیلاؤ ۔میں نے چادر پھیلائی تو آپؐ نے جیسے دونوں ہاتھ بھر کر کوئی انڈیلتا ہے اس طرح میری چادر میں انڈیلا اور فرمایا اب چادر سمیٹ لو۔ حضرت ابو ہریرہؓ کہتے ہیں اس کے بعد میں کچھ نہیں بھولا۔ اس قسم کی شفقتوں سے آپ کی زندگی بھری پڑی ہے۔‘‘

( کان خلقہ القرآن حصہ اول صفحہ: 36-37)

آیت قرآنی فَبِمَا رَحْمَةٍ مِنَ اللَّهِ لِنْتَ لَهُمْ وَلَوْ كُنْتَ فَظًّا غَلِيظَ الْقَلْبِ لَانْفَضُّوا مِنْ حَوْلِكَ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ (آل عمران160:) ترجمہ: پس اللہ کى خاص رحمت کى وجہ سے تُو ان کے لئے نرم ہو گىا اور اگر تُو تندخو (اور) سخت دل ہوتا تو وہ ضرور تىرے گِرد سے دُور بھاگ جاتے پس ان سے دَرگزر کر اور ان کے لئے بخشش کى دعا کر اور (ہر) اہم معاملہ مىں ان سے مشورہ کر…

اس آیت میں آپ ﷺ کی شفقت اور رحمت کو خدا کا فضل بیان فرمایا۔ حضرت مسیح موعود علیہ السلام فرماتے ہیں: یہ خدا کی رحمت ہے کہ تُو ان پر نرم ہوا اور اگر تُو سخت دل ہوتا تو یہ لوگ تیرے نزدیک نہ آتے اور تجھ سے الگ ہوجاتے۔

(براہین احمدیہ حصہ چہارم صفحہ 592 حاشیہ درحاشیہ نمبر 3)

ایک غلام صحابی جن کا نام زاہر تھا، شکل و صورت بھی معمولی تھی گاؤں سے سامان لاتے تھے۔ حضور ﷺ کی خدمت میں بھی پیش کرتے تھے، بازار میں فروخت بھی کرتے تھے۔ حضور ﷺان سے بہت محبت کا سلوک فرماتے تھے۔ ایک دفعہ حضورﷺ نے انہیں دیکھا کہ وہ بازار میں اپنا سودا بیچ رہے ہیں۔ آپؐ نے پیچھے سے جاکر بانہیں ان کی گردن میں ڈال دیں۔ وہ آپ کو دیکھ نہ سکے۔ کہنے لگے اے شخص! مجھے چھوڑ دو۔ پھر جوانہوں نے مڑ کر دیکھا تو انہیں پتہ چلا کہ حضورؐ ہیں تو وہ خوشی سے اپنی پُشت حضور کے جسم مبارک سے رگڑنے لگے۔ حضورﷺ فرمانے لگے میرا یہ غلام کون خریدے گا؟ وہ بولا اے اللہ کے رسول! پھر تو آپؐ مجھے بہت ہی بے کار سودا پائیں گے۔ نبی کریمﷺ نے فرمایا لیکن اللہ کے نزدیک تو تم گھاٹے کا سودا نہیں ہو۔ تمہاری بڑی قدرو قیمت ہے۔

(مسند احمد جلد3ص161)

آپﷺ کی رأفت اور رحمت کے مورَد صرف انسان ہی نہیں تھے۔ آپﷺ تو رحمة للعالمین تھے۔ جانوروں کے لئے بھی دعا کرتے نظر آتے ہیں اللَّهُمَّ اسْقِ عِبَادَكَ، وَبَهَائِمَكَ، وَانْشُرْ رَحْمَتَكَ، وَأَحْيِ بَلَدَكَ الْمَيِّتَ کہ اے اللہ اپنے بندوں کو بھی پانی عطا فرما اور اپنے بے زبان جانوروں کو بھی۔ اپنی رحمت کو پھیلا دے اور اپنی مردہ زمین کو زندہ کردے۔

(ابو داود ابواب صلوٰة الاستسقاء باب رفع الیدین فی الاستسقاء)

آپﷺ کو اپنی امت کے کمزوروں کا اس قدر خیال تھا کہ وقت وفات بھی ان کے متعلق نصیحت فرمائی۔
حضرت خلیفة المسیح الخامس ایدہ اللہ تعالیٰ بنصرہ العزیز فرماتے ہیں:

’’حضرت علیؓ اور حضرت انسؓ بیان کرتے ہیں کہ آنحضرت صلی اللہ علیہ وسلم کی آخری وصیت اور آخری پیغام جبکہ آپؐ جان کنی کے عالم میں تھے اور سانس اکھڑ رہا تھا۔ یہ تھا کہ ” اَلصَّلوٰةُ وَ مَا مَلَکَتْ اَیْمَانُکُمْ‘‘ یعنی نماز اور غلام کے حقوق کا خیال رکھنا۔

(سنن ابن ماجہ ،کتاب الوصایا ،باب ھل أَوصٰی رسول اللہ صلی اللہ علیہ وسلم )

یہ حقوق اللہ اور حقوق العباد کا بہترین خلاصہ ہے جو رسول کریم صلی اللہ علیہ وسلم نے اپنی امت کے لئے تجویز فرمایا۔ ہزاروں ہزار درود سلام ہوں اس پاک نبی صلی اللہ علیہ وسلم پرجس نے خود بھی عبادتوں کے اعلیٰ معیار قائم کئے اور اپنی امت کو بھی اس کی نصیحت فرمائی۔ اللھم صلّ علی محمد وعلیٰ آل محمد وبارک وسلم انک حمید مجید۔‘‘

( خطبہ جمعہ فرمودہ 18؍ فروری 2005ءخطبات مسرور جلد 3 صفحہ 105)

امام الزمان حضرت اقدس مسیح موعود علیہ الصلوٰة والسلام فرماتے ہیں:

’’اللہ تعالیٰ فرماتاہے کہ عَزِيزٌ عَلَيْهِ مَا عَنِتُّمْ حَرِیْصٌ عَلَیْکُمْیعنی اے کافرو یہ نبی ایسا مشفق ہے جو تمہارے رنج کو دیکھ نہیں سکتا اور نہایت درجہ خواہشمند ہے کہ تم ان بلاؤں سے نجات پاجاؤ پھر فرماتا ہے لَعَلَّكَ بَاخِعٌ نَفْسَكَ أَلَّا يَكُونُوْا مُؤْمِنِينَ یعنے کیا تو اس غم سے ہلاک ہو جائے گا۔ کہ یہ لوگ کیوں ایمان نہیں لاتے۔ مطلب یہ ہے کہ تیری شفقت اس حد تک پہنچ گئی ہے کہ تو ان کے غم میں ہلاک ہونے کے قریب ہے ۔‘‘

(نور القرآن نمبر 2، روحانی خزائن جلد 9صفحہ433:)

حضرت خلیفة المسیح الخامس ایدہ اللہ تعالیٰ بنصرہ العزیز خطبہ جمعہ فرمودہ 15؍مئی 2015ء میں حضرت مسیح موعود علیہ الصلوٰۃ والسلام کی تحریر پڑھ کر سناتے ہیں جس میں آپ ؑسید الکونین حضرت محمد مصطفیﷺ کے احسانات کا تذکرہ فرمارہے ہیں:

’’اس نے ہمارے لئے ایک ایسا رسولؐ بھیجا جو کریم ہے۔ تمام امور خیر میں صاحب کمال ہے۔ کمالات کے تمام انواع میں، ہر رنگ میں سبقت لے جانے والا ہے۔ تمام رسولوں اور نبیوں کا خاتم ہے۔ ام القریٰ میں آنے والا موعود نبی جو سچ مچ محمدﷺ ہے کیونکہ اس کے فیضیابوں کی زبانیں ہر وقت اس کی ستائش سے تر رہتی ہیں۔ اور وہ اس رو سے بھی کامل ستائش کا مستحق ہے کہ اس نے امت کی خاطر انتہائی مشقت و محنت اپنے اوپر لی اور دین کی عمارت کو بلند کیا اور اس لئے بھی کہ وہ ہمارے لئے ایک روشن اور تاباں کتاب لایا اور اس لئے بھی کہ اسے اپنے خداوند رب العالمین کے پیغاموں کے پہنچانے میں ہمارے لئے طرح طرح کی ایذاؤں کا نشانہ بننا پڑا۔ پھر اس لئے بھی کہ جو کچھ پہلی کتابوں میں ناتمام اور ناقص رہا تھا اسے آپﷺ نے کامل کیا اور ہمیں افراط اور تفریط سے اور دیگر عیوب و نقائص سے پاک شریعت عطا کی اور اخلاق کو کمال تک پہنچایا اور جو جو کچھ ناقص تھا اسے کامل کیااور تمام اقوام عالَم کو اپنا ممنون احسان کیا اور چوٹی کے فصیح و بلیغ بیانوں اور نہایت روشن وحی کے ذریعہ سے رشد کی راہیں بتائیں اور مخلوق کو گمراہی سے بچایا اور اپنے نمونے کے ذریعہ سے کنارہ کش بنایا اور بہائم و اَنعام کو گویا کردیا (یعنی ایسے لوگ جو جانوروں کی طرح رہنے والے تھے، ان پڑھ جاہل تھے، اجڈ تھے ان کو بھی زبانیں دیں اور ان کی زبانوں کو شائستہ کردیا۔ ان کے اخلاق کو بلند کیا) اور ان میں ہدایت کی روح پھونک دی اور تمام مرسلین کے وارث بنادیا اور انہیں ایسا پاک و صاف کیا کہ وہ اللہ تعالیٰ کی رضا میں فنا ہوگئے اور اللہ تعالیٰ کے لئے انہوں نے پانی کی طرح اپنے خون بہا دیئے اور کامل اطاعت کے ساتھ اپنےآپ کو بکلی اللہ تعالیٰ کے سپرد کردیا۔

پھر دوسری طرف آپؐ نے اچھوتے اور مخفی در مخفی لطائف و معارف اور نادر نکات کی تعلیم دے کر ہمارے جیسے آپ کے دسترخوان کے پس خوردہ کھانے والوں کو حقیقی فضیلت کے مقام پر پہنچا دیا۔ (اخلاق میں بھی اعلیٰ کردیا، علم و معرفت میں بھی اعلیٰ کردیا) اور آپؐ کی راہنمائی کے طفیل حق تعالیٰ تک پہنچنے کی راہیں انہوں نے اپنی آنکھوں سے دیکھ لیں۔ (روحانیت میں بھی اوپر لے گئے) اور آپؐ کے اصحاب فلک بریں پر جاپہنچے بعد اس کےکہ وہ زمین میں دھنس چکے تھے۔ پس اے اللہ! روز جزا تک اور ابدالآبد تک آپ ﷺ پر درود اور سلام بھیج۔ نیز آپ ﷺ کی آل پاک طاہرین طیّبین پر اور آپؐ کے صحابہ کرامؓ پر جو آپ ﷺ کے ناصر بھی بنے اور منصور بھی جو اللہ تعالیٰ کی چیدہ اور برگزیدہ جماعت ہے جنہوں نے اپنی جانوں اور اپنی عزتوں اور اپنی آبروؤوں اور اپنے اموال اور اولاد پر اللہ تعالیٰ کو مقدم کیا۔ رضی اللہ عنھم اجمعین۔

(البلاغ۔ روحانی خزائن جلد 13 صفحہ433-434۔ ترجمہ عربی عبارت از کتاب محامد خاتم النبیین سرور انبیاء حبیب خدا صلی اللہ علیہ وسلم مسمی بہ دریتیم۔ بحوالہ خطبات مسرور جلد 13 صفحہ308-309)

……………………(جاری ہے)