خطبہ نکاح فرمودہ حضرت خلیفۃ المسیح الخامس ایدہ اللہ تعالیٰ بنصرہ العزیز (31؍جولائی2017ء)

4 فروری 2020ء

0 پڑھنے کے لئے 5 منٹ

سیدنا حضرت امیر المومنین ایدہ اللہ تعالیٰ بنصرہ العزیز نے 31؍جولائی2017ءبروز سوموار مسجد فضل لندن میں درج ذیل نکاحوں کا اعلان فرمایا ۔ تشہد و تعوذ اور مسنون آیات قرآنیہ کی تلاوت کے بعدحضور انور ایدہ اللہ تعالیٰ بنصرہ العزیز نے فرمایا:

اس وقت میں چند نکاحوں کے اعلان کروں گا۔پہلانکاح عزیزہ بارعہ احمد چوہدری کا ہے، جو ودود چوہدری صاحب (امریکہ)کی بیٹی ہیں۔ یہ نکاح عزیزم مرزا نیّر احمد(واقف نو)کے ساتھ پچیس ہزار امریکی ڈالر حق مہر پر طے پایا ہے، جو ڈاکٹر ہیں اور میرے بڑے بھائی مرزا مغفور احمد صاحب کے بیٹے ہیں۔اللہ تعا لیٰ ہر لحاظ سے یہ نکاح بابرکت فرمائے۔

بچی کی نانی حضرت نواب مبارکہ بیگم صاحبہ کی بیٹی ہیں۔ یہ لڑکا وقف نو بھی ہے اور ڈاکٹر بھی ہے۔ اللہ تعالیٰ اس کو وقف کرنے کی بھی توفیق عطا فرمائے ۔اور دونوں اس مقصد کوپورا کرنے والے ہوں جو حضرت مسیح موعود علیہ الصلوٰۃ و السلام کی بعثت کا مقصد تھا اور اس نہج پر چلنے والے ہوں، اس طریق پر چلنے والے ہوں ، وہ عمل کرنے والے ہوں جوہم سے حضرت مسیح موعود علیہ الصلوٰۃ وا لسلام نے توقع رکھی اور جوآپ کے خونی رشتوں کو جس طرح اپنی زندگیوں میں جس کے اظہار کرنے چاہئیں۔

حضور انورنے فریقین میں ایجاب و قبول کروایا اور پھر فرمایا:

اگلا نکاح عزیزہ شمائلہ احمد کا ہے، جو مرزا کلیم احمد صاحب کی بیٹی اور صاحبزادہ مرزا وسیم احمد صاحب کی پوتی ہیں۔یہ بھی واقفۂ نو ہیں۔ ان کا نکاح عزیزم زکی احمد دانیال ابن طارق احمد صاحب کے ساتھ پچاس ہزار امریکی ڈالر حق مہر پر طے پایا ہے۔ یہ لڑکا بھی حضرت خلیفۃ المسیح الثانی ؓکی پوتی کا بیٹا ہے۔اور مرزا رفیع احمد صاحب کا نواسا ہے۔ ان کو بھی یاد رکھنا چاہیے کہ صرف دنیا میں ڈوبنے کی طرف مائل نہ ہوں بلکہ دین کو دنیا پر مقدم رکھنے کا جو عہد کیا ہے اس کو پورا کرنے والے بنیں اور آئندہ نسلوں کی بھی اس لحاظ سے تربیت کریں۔

دونوں طرف سے دونوں کے وکیل ہیں۔ مکرم سید طاہر احمد صاحب عزیزہ شمائلہ احمد کے وکیل ہیں اور مرزا طیب احمد صاحب لڑکے کی طرف سے وکیل ہیں۔