متفرق شعراء
مرے دل میں اچانک یہ خلِش کیا!
مرے دل میں اچانک یہ خلِش کیا!
کوئی کرنے لگا ہے سرزنش کیا؟
ہزاروں نفرتیں دل میں بسی ہیں
بنے پھرتے ہو تم صوفی منِش کیا؟
اگر سینے میں کینے کچھ نہیں ہیں
تو یہ تکرار کیا، یہ چپقلِش کیا
جدھر دیکھو عداوت ہی عداوت
کبھی بدلے گی دُنیا کی روِش کیا؟
محبت کا سبق گھر میں نہیں ہے
سرِ بازار ہو گی پرورِش کیا!
کوئی جوہر ہے دل میں کار فرما
وگرنہ گردِش خوں کیا، تپِش کیا
ہے بہرِ درس انساں جذبِ باہم
وگرنہ ذروں میں باہم کشش کیا؟
میں ہر وادی میں سرگرداں نہیں ہوں
مرے اشعار کیا، داد و دہش کیا
(میر انجم پرویز، مربی سلسلہ عربک ڈیسک یوکے)
مزید پڑھیں: اللہ کی رحمت ساتھ رہے یہ قافلہ چلتا جائے گا
