واقفین نو فن لینڈ کا سالانہ نیشنل اجتماع ۲۰۲۵ء

اللہ تعالیٰ کے فضل و کرم سے جماعت احمدیہ فن لینڈ کو ۲۰؍دسمبر ۲۰۲۵ء کو سالانہ وقف نو اجتماع منعقد کرنے کی توفیق ملی۔ یہ اجتماع واقفین نو کا دسواں اور واقفات نو کا نواں اجتماع تھا۔ اجتماعات مسجد میں منعقد کیے گئے۔ اس اجتماع سے قبل واقفین نو اور واقفات نوکے الگ الگ سپورٹس ہال میں ورزشی مقابلہ جات منعقد ہوئے۔ اجتماع کے کاموں کو مکمل کرنے کے لیے واقفین نو پر مشتمل ایک اجتماع کمیٹی تشکیل دی گئی جس نے الله تعالیٰ کے فضل سے انتہائی احسن طریقے سے خدمات انجام دیں۔ اس کا مقصد یہ بھی تھا کہ واقفین نو دین کے ساتھ ساتھ انتظامی اور جماعتی خدمات کی مہارت حاصل کریں۔

افتتاحی تقریب:اجتماع کا آغاز ۲۰؍دسمبر کی صبح ساڑھے نو بجے تلاوت قرآن کریم اور نظم سے ہوا۔ اس کے بعد خاکسار (نیشنل سیکرٹری وقف نو) نے واقفین نو کو خوش آمدید کہا اور پروگرام کے بارے میں آگاہ کیا۔ مکرم شاہد محمود کاہلوں صاحب مبلغ انچارچ فن لینڈنے افتتاحی تقریر میں حضورانور ایدہ اللہ تعالیٰ بنصرہ العزیز کی نصائح کی روشنی میں واقفین نو کی ذمہ داریوں اور تربیتی امور پر روشنی ڈالی۔

علمی مقابلہ جات: صبح سوا دس بجے واقفین نو اور واقفات نو کے علمی مقابلہ جات منعقد ہوئے۔ عمر کے حساب سے پانچ گروپس تشکیل دیے گئے جن میں تلاوت قرآن مجید، حفظ القرآن، نظم، تقریر فی البدیہہ اور دینی معلومات کے مقابلے شامل تھے۔ واقفات نو کے مقابلہ جات صدر صاحبہ لجنہ اماء اللہ فن لینڈ کی زیر نگرانی اجتماع ہال میں منعقد ہوئے۔ چھوٹی عمر کے بچوں نے بھی جوش و خروش سے حصہ لیا۔

ڈیڑھ بجے نماز ظہر و عصر ادا کی گئیں جس کے بعد شرکا کو کھانا پیش کیا گیا۔

نمازوں کی ادائیگی کے بعد اڑھائی بجے سے ساڑھے چار بجے تک علمی مقابلہ جات کا سلسلہ جاری رہا۔

سیمینار:شام چھ بجے وقف نو سیمینار کی تقریب منعقد ہوئی جس میں والدین کو بھی مدعو کیا گیا تھا۔ سیمینار میں تلاوت قرآن کریم، نظم اور فِنش تقریر کے بعد خاکسار نے سالانہ کارگزاری رپورٹ پیش کی۔ پھرواقفات نو کے اجتماع ہال سے چھوٹی واقفات نو بچیوں نے ترانہ پیش کیا۔ بعدازاں مبلغ انچارچ صاحب نے ’’والدین کی ذمہ داریاں‘‘ پر تقریر کی اور بچوں کی تربیت کے حوالے سے حضور انور ایدہ اللہ تعالیٰ بنصرہ العزیز کی بعض نصائح پیش کیں۔

انعامات کی تقسیم: اس کے بعد تقسیم انعامات کی تقریب منعقد ہوئی جس میں مقابلہ جات میں نمایاں پوزیشنز لینے والے واقفین کو انعامات دیے گئے۔ مکرم عطا ءالغالب صاحب نیشنل صدر نے اختتامی تقریر کی اور دعا کروائی۔ اس کے بعد مغرب و عشاء کی نمازیں ادا کی گئیں اور رات کا کھانا ہوا۔

اللہ تعالیٰ کے فضل سے اجتماع میں ۹۲؍ واقفین نو سمیت مجموعی حاضری ۱۳۵؍رہی۔الحمدللہ علیٰ ذالک

(رپورٹ:فرخ اسلام۔ نمائندہ الفضل انٹرنیشنل)

٭…٭…٭