پہنچائیں در پہ یار کے وہ بال و پَر کہاں

حضرت خلیفۃالمسیح الثانیؓ کا عارفانہ کلام (سو سال قبل کے الفضل سے)

پہنچائیں در پہ یار کے وہ بال و پَر کہاں
دیکھیے جمال ِیار جو ایسی نظر کہاں

کُچھ بھی خبر نہیں کہ کہاں ہوں کہاں نہیں
جب جان کی خبر نہیں تن کی خبر کہاں

کر دے رسا دُعا کو مِری وہ اثر کہاں
دھو دے جو سب گُنہ میرے وہ چشمِ تَر کہاں

حیران ہوں کہ دِن کسے کہتے ہو دوستو!
سُورج ہی جب طلوع نہ ہو تو سحر کہاں

ہر شب اِسی امید میں سوتا ہوں دوستو!
شاید ہو وصلِ یار میسّر ،مگر کہاں

عاشق کے آنسوؤں کی ذرا آب دیکھ لیں
ہیرے کہاں ہیں لعل کہاں ہیں گہر کہاں

سجدہ کا اِذن دے کے مجھے تاجور کیا
پاؤں تِرے کہاں مرا نا چیز سَر کہاں

درد آشنائیِ غمِ ہجراں میں مَیں کہاں
فرقت نصیب مادرو فاقِد پِدر کہاں

میری طرح ہر اِک ہے یہاں مُبتلائے عشق
حیران ہوں کہ ڈھونڈوں میں اب نامہ بَر کہاں

اے دل اُسی کے در پہ بس اب جا کے بیٹھ جا
مارا پِھروں گا ساتھ تِرے در بدر کہاں

از بس کہ انفعال سے دِل آب آب تھا
آنکھوں سے بہ گیا مرِانورِ نظر کہاں

تیری نِگاہِ لُطف اُتارے گی مُجھ کو پار
کٹتے ہیں مُجھ سے عشق کے یہ بحر و بَر کہاں

فرقت میں تیری ہر جگہ ویرانہ بن گئی
اَب زندگی کے دِن یہ کروں میں بسر کہاں

ہچکولے کھا رہی ہے مری ناؤ دیر سے
دیکھوں کہ پھینکتی ہے قضا و قدر کہاں

ہر لحظہ انتظار ہے ہر لحظہ جُستجو
رہتا ہے اب تو منہ پہ مرے بس کدھر کہاں

دیکھو کہ دِل نے ڈالی ہے جا کر کہاں کمند
کُودا تو ہے یہ بحرِ محبت میں پر کہاں

جب نقدِ جان سونپ دیا تُجھ کو جانِ من
پاس آسکے بھلا مرے خوف و خطر کہاں

ممکن کہاں کہ غیر کرے مجھ سے ہمسری
وہ دِل کہاں وہ گُردے کہاںوہ جِگر کہاں

(اخبار الفضل قادیان ۱۹؍اکتوبر۱۹۲۶ء)

مزید پڑھیں: قطعات از کلام محمود