منظوم کلام حضرت اقدس مسیح موعود علیہ الصلوٰۃ والسلام

(جلسہ سالانہ برطانیہ کے افتتاحی اجلاس میں پڑھے جانے والے اشعار)

جو خاک میں ملے اُسے ملتا ہے آشنا

اے آزمانے والے! یہ نسخہ بھی آزما

وہ دُور ہیں خدا سے جو تقویٰ سے دُور ہیں

ہر دم اسیر نخوت و کبر و غرور ہیں

تقویٰ یہی ہے یارو کہ نخوت کو چھوڑ دو

کبر و غرور و بخل کی عادت کو چھوڑ دو

اِس بے ثبات گھر کی محبت کو چھوڑ دو

اُس یار کے لئے رہِ عشرت کو چھوڑ دو

بد تر بنو ہر ایک سے اپنے خیال میں

شاید اسی سے دخل ہو دارالوصال میں

تقویٰ کی جڑ خدا کے لئے خاکساری ہے

عفت جو شرط دیں ہے وہ تقویٰ میں ساری ہے

ڈھونڈو وہ راہ جس سے دل و سینہ پاک ہو

نفسِ دنی خدا کی اِطاعت میں خاک ہو