خبرنامہ(اہم عالمی خبروں کا خلاصہ)

٭…آسٹریا کے شہر بروناؤ ام ان میں ایڈولف ہٹلر کی جائے پیدائش کو پولیس اسٹیشن میں تبدیل کر دیا گیا ہے، تاکہ اس مقام کو تاریخی طور پر غیر جانبدار بنایا جا سکے۔ حکومت نے ۲۰۱۶ء میں ایک قانون کے تحت خستہ حال عمارت کو اس کے مالک سے تحویل میں لیا تھا۔ ہٹلر ۱۸۸۹ء میں اسی گھر میں پیدا ہوا تھا، جو شہر کی مصروف گلی میں واقع ہے۔ اب عمارت میں پولیس اہلکار ۲۰۲۶ء کی دوسری سہ ماہی میں منتقل ہوں گے اور یادگار کے سامنے ایک امن اور آزادی کا پیغام بھی درج ہے۔

٭…شمالی کوریا کے راہنما کم جونگ اُن کو دوبارہ حکمراں ورکرز پارٹی کے جنرل سیکرٹری یعنی سربراہ منتخب کر لیا گیا ہے۔ پیانگ یانگ میں منعقد اہم پارٹی اجلاس میں ہزاروں رہنماؤں نے شرکت کی اور ان کی قیادت کی توثیق کی گئی۔ یہ انتخاب پانچ سال بعد ہوا، جس سے ظاہر ہوتا ہے کہ کم جونگ اُن نے ملک کی سیاست میں اپنی گرفت مضبوط رکھی ہے۔ اجلاس کے بعد چینی صدر شی جن پنگ نے بھی انہیں مبارکباد دی ہے، جس میں دونوں ممالک کے تعلقات مزید مضبوط بنانے کا اشارہ ملا۔

٭…برطانیہ میں ۲۵؍فروری ۲۰۲۶ءسے دہری شہریت (Dual Citizenship) رکھنے والے افراد کے لیے نئے داخلہ قواعد نافذ ہوں گے۔ اب دوہری شہریت والے افراد کو برطانوی پاسپورٹ، ویزا، یا سرٹیفکیٹ آف اینٹائٹلمنٹ کے بغیر ملک میں داخل ہونے کی اجازت نہیں ہوگی۔ اگر براہِ راست پاسپورٹ نہ ہو تو الیکٹرانک آتھورائزیشن (ETA) یا سرٹیفکیٹ درکار ہوگا۔ ETA کے ذریعے خاندان سے ملاقات یا سیاحت کے لیے چھ ماہ تک قیام ممکن ہوگا۔ ان اقدامات کا مقصد برطانیہ میں داخلے کے عمل کو مزید منظم بنانا ہے۔