اے شاہِ مکّی و مَدَنی سید الوَریٰؐ

(بزبان حضرت اقدس مسیح موعود علیہ السلام)

اَے شاہِ مکّی و مَدَنی، سیدُ الوَریٰؐ
تجھ سا مجھے عزیز نہیں کوئی دوسرا

ہر لحظہ میرے درپئے آزار ہیں وہ لوگ
جو تجھ سے میرے قرب کی رکھتے نہیں خبر

تیرا غلامِ دَر ہوں، ترا ہی اسیرِ عشق
تو میرا بھی حبیب ہے، محبوبِ کبریاؐ

مجھ سے عناد و بغض و عداوت ہے اُن کا دیں
اُن سے مجھے کلام نہیں لیکن اِس قدر

تیرے جِلو میں ہی مرا اٹھتا ہے ہر قدم
چلتا ہوں خاکِ پا کو تری چومتا ہوا

اے وہ کہ مجھ سے رکھتا ہے پَرخاش کا خیال
’’اے آں کہ سُوئے من بِدَوِیدی بَصَد تَبرَ

تو میرے دل کا نور ہے، اے جانِ آرزو
روشن تجھی سے آنکھ ہے، اے نیّرِ ہُدیٰؐ

از باغباں بِتَرس کہ من شاخ مثمّرم
بعد از خدا بعشقِ محمدؐ مخمرم
گر کفر اِیں بَوَد بخدا سخت کافِرَم‘‘

ہیں جان و جسم، سو تری گلیوں پہ ہیں نثار
اولاد ہے، سو وہ ترے قدموں پہ ہے فدا

آزاد تیرا فیض زمانے کی قید سے
برسے ہے شرق و غرب پہ یکساں ترا کرم

تو وہ کہ میرے دل سے جگر تک اتر گیا
میں وہ کہ میرا کوئی نہیں ہے ترے سوا

تو مشرقی نہ مغربی اے نورِ شش جہات
تیرا وطن عرب ہے، نہ تیرا وطن عجم

اے میرے والے مصطفیٰ، اے سیدُ الوَریٰؐ
اے کاش ہمیں سمجھتے نہ ظالم جُدا جُدا

تُو نے مجھے خرید لیا اِک نگہ کے ساتھ
اب تو ہی تو ہے تیرے سوا میں ہوں کالعدم

ربِّ جلیل کی ترا دل جلوہ گاہ ہے
سینہ ترا جمالِ الٰہی کا مستقر

ہر لحظہ بڑھ رہا ہے مرا تجھ سے پیار دیکھ
سانسوں میں بس رہا ہے ترا عشق دم بدم

قبلہ بھی تو ہے، قبلہ نما بھی ترا وجود
شانِ خدا ہے تیری اداؤں میں جلوہ گر

میری ہر ایک راہ تری سمت ہے رواں
تیرے سوا کسی طرف اٹھتا نہیں قدم

نور و بشر کا فرق مٹاتی ہے تیری ذات
’’بعد از خدا بزرگ توئی قصہ مختصر‘‘

اے کاش مجھ میں قوتِ پرواز ہو تو میں
اڑتا ہوا بڑھوں، تری جانب سوئے حرم

تیرے حضور تہ ہے مرا زانوئے ادب
میں جانتا نہیں ہوں کوئی پیشوا دِگر

تیرا ہی فیض ہے کوئی میری عطا نہیں
’’ایں چشمۂ رواں کہ بخلقِ خدا دِہم

تیرے وجود کی ہوں مَیں وہ شاخِ باثمر
جس پر ہر آن رکھتا ہے ربُّ الوریٰ نظر

یک قطرۂ زِ بحر کمال محمدؐ است
جان و دلم فدائے جمال محمدؐ است
خاکم نثار کوچۂ آلِ محمدؐ است‘‘

(کلام حضرت مرزا طاہر احمد خلیفۃ المسیح الرابع رحمہ اللہ)

مزید پڑھیں: اے میرے سانسوں میں بسنے والو!