خبرنامہ(اہم عالمی خبروں کا خلاصہ)

٭… برطانیہ میں موسمِ گرما کا وقت ختم ہونے کے بعد گھڑیاں ایک گھنٹہ پیچھے کر دی گئی ہیں۔ میڈیا رپورٹس کے مطابق اتوار کی رات دو بجے گھڑیاں ایک گھنٹہ پیچھے کرکے رات ایک بجے کر دی گئیں، جس سے وِنٹر ٹائم کا آغاز ہوگیا۔ برطانیہ میں سرمائی وقت آئندہ سال ۲۸؍مارچ تک جاری رہے گا، جس کے بعد دوبارہ گھڑیاں ایک گھنٹہ آگے کر دی جائیں گی۔

٭… امریکی صدر ڈونلڈ ٹرمپ نے سابق صدر بارک اوباما کی تنقید کے جواب میں انہیں انتہائی نااہل صدر قرار دیا اور الزام لگایا کہ انہوں نے ایران کو اربوں ڈالر دیے اور اسے جوہری ہتھیار بنانے کا راستہ فراہم کیا۔ ٹرمپ نے اوباما پر ہیلری کلنٹن اور کمیلا ہیرس کی انتخابی مہم چلانے پر بھی تنقید کی اور کہا کہ دونوں کو شکست ہوئی۔ مشی گن کے حوالے سے انہوں نے اپنی کامیابیوں کا ذکر کرتے ہوئے دعویٰ کیا کہ انہوں نے آٹو انڈسٹری بحال کی، ایئر فورس کا اڈہ واپس لایا اور روزگار کے مواقع بڑھائے۔ انہوں نے ووٹروں سے مائیک راجرز کی حمایت کی اپیل بھی کی۔

٭…برطانیہ میں طوفان آسٹن کے گزرنے کے اگلے ہی روز طوفان بوئیلو پہنچ گیا، جس کے باعث محکمہ موسمیات نے انگلینڈ، ویلز اور شمالی آئرلینڈ کے لیے نئی موسمی وارننگز جاری کر دیں۔ میڈیا رپورٹس کے مطابق، اسکار برا اور اسٹفورڈ شائر سمیت مختلف علاقوں میں سیلاب کا خدشہ ظاہر کیا گیا ہے، جبکہ انگلینڈ بھر میں سیلاب سے متعلق ۱۴؍انتباہ جاری کیے گئے ہیں۔ طوفان بوئیلو کے نتیجے میں تیز ہوائیں چلنے اور موسلادھار بارشوں کا امکان ہے، جس سے معمولاتِ زندگی متاثر ہونے اور بعض علاقوں میں سیلابی صورتِ حال پیدا ہونے کا خدشہ ہے۔

٭…برطانوی حکومت نے سائبر حملوں، جنگلاتی آگ، دشمن ریاستوں کے خطرات اور موسمیاتی تبدیلی سے پیدا ہونے والی ہنگامی صورتِ حال کے پیشِ نظر عوام کو گھروں میں کم از کم تین دن کا ضروری سامان ذخیرہ رکھنے کی ہدایت کی ہے۔ حکومت نے یہ ہدایت اپنے نئے پروگرام ‘‘بی ریڈی’’ (Be Ready) کے تحت جاری کی ہے۔ اس میں بوتلوں میں بند پانی، دیر تک محفوظ رہنے والی خوراک، نقد رقم اور موبائل فون چارج کرنے کے لیے پاور بینک رکھنے کی سفارش کی گئی ہے۔حکومت کے مطابق، حالیہ سافٹ ویئر خرابی، آن لائن خدمات میں خلل اور ہیکنگ کی لاکھوں کوششوں نے پیشگی تیاری کی اہمیت اجاگر کی ہے۔ وزیرِاعظم اینڈی برنہم نے کہا کہ برطانیہ کو بحران کے بعد ردعمل دینے کی بجائے فعال حکمتِ عملی اپنانی چاہیے۔ وزیرِ دفاع ویس سٹریٹنگ نے مصنوعی ذہانت سے سائبر حملوں کے بڑھتے خطرات پر تشویش ظاہر کی۔ حکومت نے جنگلاتی آگ سے نمٹنے کے لیے فوجی طیارے تعینات کرنے کے منصوبے کا بھی اعلان کیا ہے۔

٭…یورپ کے کئی ممالک میں مہنگائی، بے روزگاری اور حکومتی پالیسیوں کے خلاف احتجاجی مظاہرے ہوئے۔ اٹلی کے دارالحکومت روم میں مظاہرین اور پولیس کے درمیان جھڑپوں کے نتیجے میں ۱۱؍افراد گرفتار جبکہ ۹۶؍افراد زیرِ حراست لیے گئے۔ سپین کے شہر بارسلونا میں بھی پولیس اور مظاہرین کے درمیان تصادم ہوا، جس میں متعدد افراد زخمی ہوگئے۔ بیلجیم کے دارالحکومت برسلز میں حکومت مخالف مظاہرین کو منتشر کرنے کے لیے آنسو گیس اور مرچوں کے اسپرے کا استعمال کیا گیا۔ اس کے علاوہ البانیہ میں بھی احتجاجی مظاہرے کیے گئے، جن میں عوام نے معاشی مشکلات اور حکومتی پالیسیوں پر اپنے تحفظات کا اظہار کیا۔

٭…امریکا نے سعودی عرب میں غیر ہنگامی سفارتی عملے اور ان کے اہلِ خانہ کو فوری طور پر روانہ ہونے کا حکم دے دیا ہے، جبکہ اردن، قطر، متحدہ عرب امارات اور لبنان میں بھی امریکی سفارتی عملے کی تعداد کم کی جا رہی ہے۔ سی این این کے مطابق، امریکی انٹیلی جنس نے خبردار کیا ہے کہ ایران پر ممکنہ حملوں کی صورت میں مشرقِ وسطیٰ میں موجود امریکی اہلکار ایرانی حملوں کا نشانہ بن سکتے ہیں۔ ان خدشات کے پیشِ نظر سفارتی عملے کے انخلا میں تیزی لائی گئی ہے۔ مزید برآں، ممکنہ سیکیورٹی خطرات کے باعث امریکی شہریوں کو عراق کا سفر نہ کرنے کی ہدایات میں توسیع کر دی گئی ہے۔

٭…٭…٭