تیری یادوں کا ہر اک نقش رلائے، امّاں

تیری یادوں کا ہر اک نقش رلائے، امّاں
دردِ دل ہے کہ کسی طور نہ جائے، امّاں

تیری ہر بات میں حکمت تھی، نصیحت تھی چھپی
اب ترے ہجر کا ہر زخم ستائے، امّاں

سونا لگتا ہے مجھے اب یہ زمانہ سارا
کوئی لمحہ بھی مِرے دل کو نہ بھائے، امّاں

آسماں ٹوٹ پڑا مجھ پہ قیامت کی طرح
تیرِ فرقت مرے سینے پہ چلائے، امّاں

تیری بانہوں کا وہ جھولا، وہ محبت کی تھپک
یاد مٹتی ہی نہیں، کیسے وہ جائے، امّاں

تُو جو ہنستی تھی تو گھر ہنستا تھا سارا میرا
اب ترے بعد کا ہر لمحہ ڈرائے، امّاں

خالی بستر کو ترے دیکھ کے روتی ہوں مدام
اشکِ غم آنکھ مِری روز بہائے، امّاں

ہر گھڑی مصحفِ رُخ میں ترے ملتا تھا سکوں
اب کہاں سے کوئی وہ چہرہ دکھائے، امّاں

تیری تربت پہ سدا برسے گی رحمت کی گھٹا
نور ہی نور ترے گرد سمائے، امّاں

(بشریٰ سعید عاطف۔ مالٹا)

مزید پڑھیں: عجب اک ماجرا گزرا عرب کے ریگزاروں میں